So, hüt simer auso di nöie Westernsättle ga probiere! Isch no chli Action gsi... Mir si zerschte Mau ds dritt ga usritte. Dr Papi uf dr Suleika, dr Hans uf dr Samantha (mitem aute Vielseitigkeits-Sattu u ig uf dr Habanera (di schwierigschti). Wo mer chlei hei wöue trabe hei di drü grad i Galopp gwächslet, aber das hei mir du nid wöue. Wüu plötzlech hani gmerkt, wi mi Sattu uf dr Habanera gäge rächts rütscht. Bi däm Sattu chame dr Gurt nume mitemne spezielle Chnüppu amache, u nid wi üeblech mitemne Lädergurt. Drum hani ne o nid richtig chönne azieh... Aber es isch nüt passiert, u mir heis ämu luschtig gha...

[Permalink]

Geschter isch z Gümlige Fasnacht gsi. Mit dr Füürwehr simer ga dr Verkehr regle. U i ha grad mitem Füürwehr-Pick-up dörfe umefahre (zersch mau woni mitemne Ahänger dranne Outo fahre!!!).

Es isch eigentlech guet gange, di meischte Lüt hei no so Verständnis gha... Nachem Umzug heimer no eis chönne ga zieh, u es isch du sibni worde, bisi deheime bi gsi. Am haubi nüni bini scho wider zwäg gsi für ads Fescht i Mattehofsaal.

Es isch auso sehr luschtig gsi, uf dr Homepage vo de Chrottegurgler fingt me no es paar Föteli...

[Permalink]

Hüt, Fritig 9. März 07, bini uf di füfe i Biembach. Mir hei ir Tierwelt gseh, dass öpper zwe Westernsättle (eine für Fr. 400.- u eine für Fr. 800.-) usgschribe het. Da het dr Hans grad aglüte u het usegfunge, dass die Lüt, wo dä verchoufe, grad ir Nöchi wohne.

Mir si auso losgfahre, d Wildenegg ab, u dr anger Hoger wider ufe, über "Waudwäge", mega ids Kaff ufe (aber de würklech Kaff!!!). Womer scho fasch hei wöue umchere, wüu mer hei dänkt, hie cha ja gar nüm cho, isch du es Burehus zum Vorschiin cho...

Mir hei di Westernsättle auso agluegt, u mi het dünkt, dass die super guet zwäg si. Für dä Pris hani auso schlächters erwartet! Di Familie het o zwe Haflinger gha (e äuteri Stuete u e drüjähregi). Dr Sohn, dr Thomas, het di äuteri ufegno, hetere dr Sattu drufta u het gseit, i söu schnäu drufhocke; är näm de di Jungi o schnäu ufe. U de simer schnäu es haub stündli ga usritte. Mega schöni Wäge!!! Är rittet äbe ohni Sattu, drum heisi di zwe wöue verchoufe; bi ihne ligesi eh nume im Wäg, heisi gmeint...

Womer si zruggcho u d Ross versorget hei, si di Herre scho im Kafi ghocket u hei dr Handu scho abgschlosse gha. Mir hei, nachemne Kafi u es paar Güetzi, auso di Sättle ids Outo packt u si zrugg...

Am Sunntig gani se de ga usprobiere, i bi gspannt, wi d Habanera u d Suleika reagiere...!

[Permalink]

Geschter Abe si mir drü "Nöilinge" ir Füürwehr (Isa, Fidu u ig) ad Atemschutzüebig. Mir wäre au drü interessiert i AS zga, u drum heimer mit dörfe.

Dr Grütter Tinu het mit üs chli absyts vom Gscheh (vor eigentleche Üebig imne Abbruchhuus) ds Grät agluegt, het nis aues erklärt u glichzytig verzeut wis ablouft ire Üebig oder im Isatz.

Zerschte mau di Maske adslege isch scho chli heavy, me mues ar Technik scho chli vertroue, ämu ig, wo schnäu Platzangscht überchume... Mit chli Überwindig hani di Maske aber o agleit und, siehe da, es isch Luft cho!

Mir si zersch mau chli ir Gägend umegloffe, das mer üs ads schnufe im Grät gwöhne. Aschliessend simer aber o ids Huus, womer zwe lääri Rüüm hei "abgsuecht". Das heisst, es isch no einigermasse chli häu gsi, so dasmer glich no hei gseh, womer häreloufe. So für ds erschte Mau isch das no gäbig...!

Zrugg im Hof heimer natürlich o d Retablierig düregspiut, das heisst, ds Grät wider betriebsbereit mache (Fläsche uswächsle, Maske uswächsle...).

Es isch mega interessant gsi, u i bi überzügt, dass mir üs drü aui a Kurs amäude. Es git aber no e chlini Hürde: Dr Fitness-Tescht bim Vertrouensarzt... Naja, i dänke, dä wärde mer o überstah, i ha de chli meh Schiss füre Kurs, wemer durch ängi Gäng u Rohr müesse schnaage, i absoluter Dunkuheit...
Aber da di nächschte paar Kürs (leider) scho usbuechet si, wird das ersch so im Novämber si...

[Permalink]