Unsere Ferien...
Morgen ist mein letzter Arbeitstag. Bevor ich am 1. Juli meine neue Stelle beim SVPS antrete, werden Ribana, Diva und ich vom Mittwoch bis Samstag ein paar Tage „Ferien“ geniessen! Ich werde Ribana in St. Ursen abholen und nach Court BE zu Sylvia Seebacher fahren. Ich erhalte so die Gelegenheit, mit Ribana etwas intensive Bodenarbeit zu machen und kann Sylvia etwas bei der täglichen Arbeit unterstützen.
Das bedeutet zwar, um 6.30 Uhr im Stall stehen, doch für mich ist dies wie Ferien – den ganzen Tag um die Tiere und draussen arbeiten zu können! Ich freue mich und bin gespannt auf die Tage, auf das, was wir mit Ribi erreichen! Auch Diva wird nicht zu kurz kommen, wir werden nun intensiv ein paar Sachen lernen, vor allem aber, dass ich ihr den Maulkorb anziehen kann und sie diesen etwas besser akzeptiert…
Wider mau e Itrag…
Ir letschte Zyt hani sehr viu los, drum wird mi Homepage grad nid so hüüfig aktualisiert… Einersits isch Ändi März dr Abschluss vor Gugge-Buechhautig, woni Kassierere bi, fällig, u da gits no ds einte oder ds angere ufdsschaffe; anderersits isch no d Buechhautig vor Free Mountain Ranch, woni hiufe; d Diva, woni chli meh mitere wett mache, was „Kunststückli-lehre“ ageit, mis Rössli d Ribana, woni immer wieder gärn bsueche ure öppis biibringe, u natürlech no mis Schätzeli im (fasch-) Ämmitau, woni doch o gärn bsueche…!
Es louft auso immer öppis!
Letscht Samschtig hani aber churz Zyt gha, a 3. Tag der Pferdezucht uf Avenches ds ga. Es isch es churzes Bsüechli gsi, hätt mi eigentlech wöue informiere, wi das louft, weni d Ribana bim Pinto-Zuchtverband wett la registriere. Da aber säute öpper am Stand isch gsi, hanis grad la sy. Cha ja das ar BEA no nachehole.
Es si diversi Rassene vorgstellt worde ufem Usseplatz. Au viertu Stund e anderi Rasse. Es isch no schön gsi, d Berber-Züchter hei sech i origineller, berbischer Verchleidig präsentiert, d Eseli si vorem Wage igspannet gsi, u d Araber-Züchter hei zeigt, dass e Araber nid nume für d Wüeschte-Renne tauglech isch, sondern o für d Dressur und ds Westernritte…
Sehr spannend! Ha o Glägeheit gha, mitem Heru, dr Stallbsitzer wo d Ribana isch, und am Sacha Jacqueroud (Redaktor vom westerner.ch) e chli ds schwätze u diversi Themene ds bespräche.
Mis Weekend
Mäntig morge – ds Weekend isch scho wieder verbi…
Am Fritig namitag hani ändlech mis Internet chönne irichte, aber bruche hanis sider no nid viu chönne. Ha no nid so Zyt gha…
Am Abe bini zum Thömu u mir si uf Arni ads Bar- u Pub (weme däm so cha säge…) u heis dert fei e chli luschtig gha. E Kolleg mit sire Fründin isch o dert gsi, u dr Thömu het no paar angeri Lüt kennt; unger angerem isch o dr Sohn vo sim zuekünftig Chef dert gsi. Dr Thömu wird ab März mit ihm zäme schaffe. Ds Hufschmiede isch natürlech grad Thema Nr. 1 gsi…! Isch nid witers schlimm, wüu mi interessierts ja o sehr.
Am Samschtig morge hani Hundeschueu gha. D Diva het guet mitgmacht, obwou si öppe die gschlotteret het vor Chäuti… Mir hei chli Warteüebige gmacht, das chasi afang guet. Ds Platz us dr Bewegig heimer o agluegt; das isch e Punkt woni no chli wett üebe mitere. Aber es chunnt!!
Zmittag hani bim Thömu gässe, när isch är wieder i Wald mit sim Vater ga Holz spaute. I bi zum Hans Schüpbach ga d Samantha ritte – sit langem wieder einisch!! D Suleika heisi verchouft, im Stau stöh nume no d Habanera u d Samantha. Me merkts scho, dass si nüm ds dritt, sondern nume no ds zwöit si, d Samantha isch viu ruhiger. Beidi Ross si eher usglichener, es isch immer chli e Aspannig gsi zwüsche de dreie. Eini het sech immer chli aus füfts Rad am Wage (oder dritts Rad am Velo…) gfüeuht.
Mir hei es chlises Tüürli vo drü viertu Stund gmacht.
Aschliessend bini hei zum Thömu, u siner Ross si scho putzt gsi. Mit heise vore Wage gspannet u si no es Stündli ga e Tour mache. Herrlech!!! Das Wätter, di Landschaft… U sogar d Diva hets chönne gniesse! Si isch ersch ds zwöite Mau mitcho u louft perfekt schön näbem Wagerad, bällt d Ross nid a, secklet chli im Zügs desume u chunnt aber immer wieder schön zum Wage, wemere rüeft! Ha mega fröid are! (Si tuet drum hüfig d Ross abälle, aber bim Wägele macht si das absolut nid!).
Am Sunntig simer zu mine Eutere ga zmörgele u när heimer nis ufe Wäg nach Torgon gmacht. Dr Papi, dr Sebi, dr Thömu u ig si ga schile. Perfekts Wätter, herrleche Schnee u dank em Sebi heimer o immer gwüsst, wo düre fahre, u wo di guete Pischtene si (dr Sebi het ds Torgon zwe Saisons am Schilift büglet).
Womer si heicho het nis ds Mami no es Fondue gmacht – e gmüetleche Abschluss vo däm wunderschöne Weekend!
Skitag Adelboden, 10.02.2008
Letschte Sunntig simer uf Adelbode ga Schi fahre. Dr Sebi, dr Papi u ig hei uf dr Sillere mit dr Isabelle, minere Schwägere, abgmacht. Si het mau ohni ihri zwöi chline Meitschi wöue ga schile, u so heimer zviert es paar rasanti Abfahrte gmacht.
D Nachwehe vor Bärner Fasnacht hani aber scho chli gspürt, ha auso nid söfu Chraft gha… D Oberschänkle hei gli mau brönnt, aber es isch glich e mega schöne Tag gsi. Ds Wätter het gstumme, u dr Schnee isch o optimau gsi!
Füürwehrüebig - Bärner Fasnacht
Fritig u Samschtig isch d Bärner Fasnacht gsi!
Am Fritig hani no mini erschti Atemschutzüebig im Grät gha!! Mir si ds Zwöit, wo dr Kurs no nid hei, aber sit afangs 2008 mitem Atemschutz d Üebige bestritte. Letscht Fritig äbe, heimer z’erschte Mau ids Grät dörfe u hei zäme mitemne erfahrene Atemschützler e Ruum abgsuecht. Es isch auso schono interessant gsi!
Nach dr Üebig hets no es Fondue gä (das wos eigentlech nach der erschte Üebig im Januar hätt söue gä….), u nach däm bini schnäu hei ga ds Kostüm alege, u bi uf Bärn grasslet. Am haubi zwöufi bini zmitzt im Fasnachtsgetummel gsi, u es het mr no glängt, am Zwöufi dr letscht Uftritt mit ds bestritte.
Am Samschtig Mittag heimer üs wider im Casino troffe, dasmer e chli Farb ids Gsicht überchöme… Nachem Schminke si ds Rämi u ihres Schätzeli, ds Mami u ig no ids Starbucks es Kafi ga trinke, womer no dr Sebi churz hei troffe. Langsam heimer nis du när ufe Wäg Richtig Klösterlistutz gmacht. Mitem Startnummero 14 heimer dr Umzug i Agriff gno – bim herrlechschte Wätter!!
Mir hei gueti Uftritte gha, super gspiut u o d Lüt hei nid schlächt mitgmacht. Dank de Broncos Security ischs mire Meinig nach o viu ruhiger gsi aus di letschte Jahr – sprich, es het weniger Vorfäu gä…
Am viertu ab eufi heimer üs ufglöst, u jede het säuber no uf d Gass chönne. I bi bim Rathuus no d Pläfä Fleglä ga lose (miner Meinig nach di beschti Gugge uf Bärner Bode…), u ha mitem Stöffu no eine gno.
Aschliessend hani mi Richtig Dieterswald begä. I däm Dörfli, unwit wo dr Thömu, mi Schatz, wohnt, het e Kollegin vo ihm ihre 25. Geburi gfiiret. Bi ihre deheime heisi d Chäuär-Bar, optimau für e chli ds feschte. Di paar Lüt wo no dert si gsi, si natürlech aui gspannt gsi, was de dr Thömu für eini mitbringt…! Mir hei eine, zwe trunke u tou tanzet, u i ha o dr Nachbar vom Thömu lehre kenne, dr Steffu. Är het u fröid amer gha u het geng wider betont, wi schön dass doch das isch, dass dr Thömu u ig enang hei gfunge (vilech ischs o am Aukohou gläge, daser so sentimentau isch gsi??!!)
Fasnacht...
So, o für üs het d Fasnachts-Saison agfange. Am 19. Januar 2008 heimer üse Saison-Start mitere gmüetleche Fasnacht ds Wyler b. Utzensdorf bestritte. Es isch leider nid so viu los gsi, aber das isch vilech o dranne gläge, dass di Fasnacht ds erschte Mau düregfüehrt isch worde.
Am 26. Januar heimer när d Bäuper Fasnacht gfiiret. Das heisst, üsi Mitglieder hei scho abem Fritig Namitag gwürkt. Zäut ufsteue, Bar irichte, Raclette-Stübli zwägmache… I bi vom 23.00 bis 03.00 verantwortlech gsi, dass dr Aare-Saal igrichtet u dekoriert wird. Wobi d Organisation vor Deko het üsi Deko-Kommitee Präsidentin überno, da bini auso schono froh gsi…
Am Samschtig isch es mega Fescht gsi, mir heis luschtig gha, u da mis Schätzeli so guet cha tanze, bini dr ganz Abe immer wieder i Gnuss cho, ds Tanzbei chönne ds schwinge…
Am Sunntig morge am zäni (u das isch de nachere Fasnacht seeeeehr früeh!!) heimer wider uf Platz müesse si zum ufrume. I bi wider füre Saal verantwortlech gsi, u mir si no rächt zügig vorwärts cho. Am haubi vieri heimer aui hei chönne, u so heimer glich no chli öppis vom Sunntig gha.
Es isch asträngend gsi, wi jedes Jahr, aber ds Fescht het mega gfägt!
Läbeszeiche vo mir...
So, es isch scho bau lang här, woni ds letschte Mau mini Homepage aktualisiert ha… Ha immer no ds Problem, dasi deheime ke Internet-Aschluss ha – mit mine USB-Aschlüss isch öppis nid ganz Bock…
Mir geits guet, sehr guet, obwou i immer öppis ztüe ha u fasch nid zur Rueh chume – aber das isch me sech vo mir ja gwanet… Im Momänt isch d Fasnacht wider aktuell, wi o ds Schifahre.
D Diva u d Ribana haute mi uf Trab, mit dr Diva gani no id Hundeschueu uf Zollikofe, wobi i itz de e anderi Schueu wett sueche, es isch mr eifach ds wit, jede Samschtig uf Zollikofe.
D Ribana macht o Fortschritte, obwou si immer no chlei ufmüpfig isch. Si brucht e konsequänti Hand, me muess ihre zeige, wär dr Chef isch.
Mittlerwile git si aber ohni Problem aui vier Huf und es isch langsam aber sicher nache füre erscht Hufschmied-Bsuech. Nächschts Wucheändi wirds de sowit si!
So, itz muesi aber würklech abkläre, was mit mim PC los isch…!
Ds letschte Weekend
Am Fritig, 14.12.07, bini ar Ribana es Bsüechli ga abstatte, u hare no grad es „Gschänkli“ mitbracht…
Am Mittag bini nämlech no im Horseland gsi u hare es Halfter kouft! Ihres Fühli-Halfter isch drum scho fei e chli äng! Es schöns, königblaus Halfter het si übercho, wo natürlech itz no im chlinschte Loch isch, me chas de mit dr Zyt no vergrössere, we si de no wachst.
Am Abe hani no mit dr VSF ds Gschäftsässe gha. Mir hei im Rössli ds Säriswil e gmüetleche Abe mit sehr feinem Ässe verbracht! D Tamara, mini Nachfolgerin, het sech fei e chli guet igläbt im Team. Es isch immer wider luschtig zuedslose, was dr Ruedi u d Annerös us über 20 Jahr bir VSF für Gschichtli ds verzeue wüsse…
Letscht Wucheändi het dr Eywald-Lift ufta, da hani natürlech sofort uf d Schi müesse! Nach dr Hundeschueu am Vormittag (wo d Diva übrigens mega guet mitgmacht het), bini am zwöi mitem Stöffu u em Papi ga schiile. Es het zwar nid so viu Schnee gha unger us, u dr Näbu isch o chli hartnäckig gsi, aber es het glich Spass gmacht. Sowieso – schiile fägt eifach!!
Am Sunntig heimer bi mine Eutere es erschts Wiehnachtsfeschtli gha. Stuckis (am Papi siner Eutere u sini Schwoscht mit Familie) si cho u mir hei zäme Zmittag gässe u Gschänkli uspackt. Es isch u gmüetlech gsi, u dank em Schnee vorusse u em Tanneböimli dinne isch würklech e schöni Wiehnachtsstimmig ufcho…
Zügu-Weekend Nr. 2
So, letschts Weekend hani no meh oder weniger dr Räschte ufezüglet - itz fäuht nume no dr Computer, d Ordnere u miner Chleider, woni no nid zämepackt ha.
I bi letscht Samschtig no id Ikea u ha no es paar Sache kouft, unger angerem no es Salon-Tischli u e Chuchitisch mit Stüehl. Itz wirds langsam wohnlech, obwou immer no di meischte Chischtene umestöh. Vorhäng fähle ono, di chöme natürlech de ono (Mami???).
Dr Stromzähler wird (hoffentlech) di Wuche ono agschlosse, so dasi nid wider mues mit dr Stirnlampe irichte...
Hüt abe gani no uf d Gmeindsverwaltig ds Rüschegg, miner ehemalige Arbeitskollege (vor Lehr här) ga bsueche u mi amäude, da fröi mi scho druf!
Disi Wuche hani au Abe öppis los; d Diva gniesst es paar Tag Ferie bi mine Eutere u d Ribana mues leider di Wuche o ohni mi uscho... Aber drfür chani se de ir nächschte Zyt umso meh ga bsueche... *freu*!
Zügu-Weekend Nr. 1
So, das Wucheändi hani afang e Grossteil züglet.
Am Donnschtig Abe bini mit mine Eutere no id IKEA u mir hei afang es paar Möbel kouft. I ha mi für d Möbel-Serie "LEKSVIK" entschiede, di gfaut mer mega, obwou's vilech mi Wohnig e chli dunku macht...
Am Fritig morge bini no churz zur Ribana, am Namitag heimer afang zwöi Möbu (Gstell, Badzimmergstell) zämegschrubt, u i ha afang zwe Chischte ir Chuchi uspackt u igrumt.
Da mr das Wucheändi vor KMB no es "Probewucheändi" hei gha, hani am Samschtig u am Sunntig Namitag ke Zyt gha, witer usdspacke. Am Sunntig morge hani mitem Papi no ds Fernsehmöbeli zämegschrubt, u när isch scho wider Zyt gsi, ufsdshöre. Mir si zum Mami ga zMittag ässe ad Wiehnachtsustellig ds Hirschhorn (si het dert e Stand) u när hani scho wider KMB-Prob gha...
Laminat verlege
Am Samschtig, 10.11.07, het mr dr Stöffu i mire nöie Chuchi dr Laminat verleit. Öppe am haubi zäni heimer agfange u hei dänkt, dass mr sicher bis am Namitag hei, aber um di 12 ume simer scho nache gsi.
Während däm dass dr Stöffu dr Laminat gleit het, hani afang aues chli usgmässe, damit i ungfähr weiss, was für Möbeli dasi de no mues choufe... So für im Bad u im Igang wetti de schono öppis gängele!
Itz geits no drum, di räschtleche Sache i ds packe, u übernächschts Wucheändi wetti de ds erschte Mau i mire nöie Wohnig übernachte... Freue mi scho!
|
Chuchi vor Laminat verlege
|
Chuchi nach Laminat verlege
|
|
Bad
|
Stube
(vom Schlafzimmer fäuht es Bild, gseht aber ähnlech us wi d Stube)
|
Stall für Ribana!
Wi dir unter "My Passion" scho heit chönne läse, bini stolzi Bsitzerin vor Ribana o'Hara, ere 1.5 jährige Pinto-Stuete.
Da das erscht sit Afangs Wuche klar isch, und d Ribana bis am Samschtig, 27.10.07, vo ihrer bishärige Fühliweid wäg mues, hani schnäu e Stress gha, es guets Plätzli ds finde. Di meischte Weide si scho usbuechet, oder de sisi ds Zürich, im Graubünde oder im Aargau...
Dank emne super Tipp vor Sylvia und ere no bessere Empfählig vom Sacha Jacqueroud (Redaktor vom Westerner), hani e Stall in St. Ursen gfunde, wo eifach super isch! Mega riese Weide, e grosse Laufstall, super Infrastruktur... D Ribana wird ine Gruppe vo verschiedene Ross i verschiedene Altersklasse integriert wärde.
I fröie mi, d Ribana am Samschtig dert häre dörfe ds bringe!
Besichtigung Tagesplätzli Diva
Am Samschtig morge si ds Mami, d Diva u ig es Tagesplätzli für si ga aluege.
Ir Tierpension Rauschbach (www.rauschbach.ch) im Schwand ds Rüschegg hets gnue Platz für Hund & Katz, si wärde super betreut, hei mega Uslouf u beheitzti Zwinger, wärde beschäftigt, hei Rudelkontakt u Mönschekontakt.
I bi froh, ändlech (!) es geeignets Plätzli, wo doch so nöch isch, gfunge ds ha! I fröie mi, dass d Diva abem 3. Dezämber ihre Tag dert darf verbringe!
BAUHAUS...
So, hinech geits ids Bauhaus!
Dr Stöffu isch am Fritig mini nöi Chuchi cho usmässe, är wird mr Laminat verlege (übere aut, grusig, dunkurot 70er-Jahr-Novilon...).
Hüt am Abe gömer ids Bauhaus, mau ga luege, wases so git a Laminat, u wemer de grad passende finde, näme mr ne de grad mit.
Verlege tüemer vorussichtlech am 9. Novämber...Es rückt langsam nöcher, mues scho langsam afa ipacke...
Plane u organisiere...
So, ha scho längers ke Iitrag me gschribe; itz chunnt wider mau eine...
I bi im Momänt grad chli beschäftiget mit plane u organisiere... Dir heit ja äuä scho uf dr Istigs-Site gläse, dasi per 1.12.2007 wirde zügle! Jaja, ds Rüschegger-Ländli het mi wieder!!
I fröie mi, aber es git einiges ds organisiere. Wohnig kündige, Internetaschluss wo über mi louft kündige, Hundehort sueche, Parkplatz sueche (bir nöie Bude)...
I wirde per 1.12.2007 o grad Job wächsle. Bir Privera, woni nach dr Lehr bis zum Praktikum häre gschaffet ha, hani e 90 % Astellig übercho. I ha mis Arbeitspänsum leider wieder müesse erhöhe, schüsch vermahnis finanziell eifach nümme... Ds grosse Problem isch itz eifach, dasi es geeignets Plätzli für d Diva mues sueche, wosi dr Tag cha verbringe. Ha mittlerwile nach eim Monet intensiv sueche scho zwöi Alternativene, wott aber no di Tierpensione ds Rüschegg afrage (dert hets doch sage und schreibe 2 Hundeferieheim!!). Parkplatz hani ändlech gfunge - ds Wabere, mues haut eifach de no ds Bähnli bis zur Privera näh. Chunnt aber aues i auem biuiger, aus weni ir nöchere Umgäbig vor Bude e Parkplatz würd miete, da die viu tüürer si...
U när gits no angers ds organisiere - i wett ir nöie Wohnig Laminat ir Chuchi verlege, wüu dä aut dunkurot 70-jahr novilon pässlet mr nid so... Damit das biuiger chunnt, tüemers säuber verlege (auso, nid ig säuber, das chönnti gloub nid grad...).
U d Hobbys wie Füürwehrband, KMB, Ritte und Hund löh eim o nid grad verschnufe. Aber da isch me ja säuber tschuld weme so viu macht....  Wird aber de öppe o chli weniger...
Jaja, ha auso im Momänt grad chli viu um d Ohre...
Kostenloses Blog bei Beeplog.de
Die auf Weblogs sichtbaren Daten und Inhalte stammen von
Privatpersonen. Beepworld ist hierfür nicht verantwortlich.
|
