Geschter Abe bini öppe am haubi eufi ga lige, dr Stöffu isch no uf blibe. Plötzlech stürmt er ids Schlafzimmer u rüeft: "Ufstah, muesch cho!! Chum itz!!". I bi so baff gsi (bi ja scho am schlafe gsi): "Was isch los? Isch Alarm?" (i hane nid emau ghört....). - "Wohnigsbrand!". Uuuu, de bini du schnäu uf gsi!

I bi bim Bänz ids Pi (Unimog) igschtige u de simer losgfahre; vorab ds TLF, när dr Hubretter, u no mir. I ha gschlotteret einersits vor Ufregig aber vorauem o wüui u chaut ha gha. Es het mer nume glängt, ds T-Shirt unger dr Brandschutzjacke adslege...

Mir si am Schadeplatz itroffe, u d "Rennleitig" (Pozilei) het o nid lang uf sech la warte. D Atemschützler si ids Grät u si mitem Schnäuagriff (Schluch ab TLF) ids Hus. I ha bim Rüedu usse gwartet uf witeri "Befähle", oder das me öppis hätt chönne häufe. Dr Rüedu het mit de Atemschützler gfunket, u de isch schnäu uscho, das ir beträffende Wohnig kener Persone meh si. Ufff... mau e Erliechterig! Gli druf abe isch ono dr Schnäuisatz cho (ca. 16 Lüt)... Mir hei no e Lüfter ids Stägehuus gsteut, dasses dr Rouch chli verlüftet.

Plötzlech chunnt aber dr Rolä mitemne Ching ufem Arm zum Hus us; da erchlüpft me schono chli! Es isch d Familie gsi, wo ob dr "brönnende" Wohnig wohnt; si hei Rouch verwütscht u mir hei se zur SaPo (wo o scho uf Platz isch gsi) begleitet.

Wo aues glöscht isch gsi, isch eine no ga d Wärmebiudkamera hole, für sicher ds si, dases niene meh e Wärmequelle het, wo wider chönnt afa brönne. Dr Rolä het mi grad päcklet u gseit, i söu doch grad mitcho luege, de heigi sone Brand o scho mau gseh. Isch auso no idrücklech, was so wenig Füür cha bewürke...

Brönnt het eigentlech es Bett, resp. e Matratze. Ds Zimmer isch "vercholet", aber ussert em Bett si kener angere Möbu drinne gsi. Brandursache het uf Platz nid würklech chönne klärt wärde, si nähme a, es sig wägemne Heizchüssi, wo ufem Bett isch gsi.

Öppe am haubi drü (churz vo de eine isch übrigens dr Alarm inecho) simer du vor Rennleitig "entlah" worde u mir si hei zue gfahre. Es scho so liecht gschneierlet, und siehe da, hüt morge hets auso scho rächt Schnee gha...

Mir hei im Magazin no e chli glaferet (es paari hei no es Bierli trunke...) u am drü simer o wider im Bett gsi. Di obligati Duschi nach somne Isatz (Rouch blibt sofort überhau hange, wäää, stinkegi Haar, stinkigs T-Shirt...) hani aber ersch am morge gno...

[Permalink]