Skitag Adelboden, 10.02.2008
Letschte Sunntig simer uf Adelbode ga Schi fahre. Dr Sebi, dr Papi u ig hei uf dr Sillere mit dr Isabelle, minere Schwägere, abgmacht. Si het mau ohni ihri zwöi chline Meitschi wöue ga schile, u so heimer zviert es paar rasanti Abfahrte gmacht.
D Nachwehe vor Bärner Fasnacht hani aber scho chli gspürt, ha auso nid söfu Chraft gha… D Oberschänkle hei gli mau brönnt, aber es isch glich e mega schöne Tag gsi. Ds Wätter het gstumme, u dr Schnee isch o optimau gsi!
