Wider mau e Itrag…
Ir letschte Zyt hani sehr viu los, drum wird mi Homepage grad nid so hüüfig aktualisiert… Einersits isch Ändi März dr Abschluss vor Gugge-Buechhautig, woni Kassierere bi, fällig, u da gits no ds einte oder ds angere ufdsschaffe; anderersits isch no d Buechhautig vor Free Mountain Ranch, woni hiufe; d Diva, woni chli meh mitere wett mache, was „Kunststückli-lehre“ ageit, mis Rössli d Ribana, woni immer wieder gärn bsueche ure öppis biibringe, u natürlech no mis Schätzeli im (fasch-) Ämmitau, woni doch o gärn bsueche…!
Es louft auso immer öppis!
Letscht Samschtig hani aber churz Zyt gha, a 3. Tag der Pferdezucht uf Avenches ds ga. Es isch es churzes Bsüechli gsi, hätt mi eigentlech wöue informiere, wi das louft, weni d Ribana bim Pinto-Zuchtverband wett la registriere. Da aber säute öpper am Stand isch gsi, hanis grad la sy. Cha ja das ar BEA no nachehole.
Es si diversi Rassene vorgstellt worde ufem Usseplatz. Au viertu Stund e anderi Rasse. Es isch no schön gsi, d Berber-Züchter hei sech i origineller, berbischer Verchleidig präsentiert, d Eseli si vorem Wage igspannet gsi, u d Araber-Züchter hei zeigt, dass e Araber nid nume für d Wüeschte-Renne tauglech isch, sondern o für d Dressur und ds Westernritte…
Sehr spannend! Ha o Glägeheit gha, mitem Heru, dr Stallbsitzer wo d Ribana isch, und am Sacha Jacqueroud (Redaktor vom westerner.ch) e chli ds schwätze u diversi Themene ds bespräche.
