Juhui, hüt abem Mittag hani frei u morn ono!
Morn gani mit dr Monä ad Bea, i fröie mi! I wett de chli ga Rössli luege... Am 11.00 isch de no e Pat Parelli Vorstellig, di wetti nid verpasse. Une grosse Heckschibe-Chläber mit emne Westernriter wetti de o choufe...

Aber dä Chläber tueni äuä de no nid ufds Outo. I müesst ja mi Peugeot im Mai ga prüefe. I hane afang zum Mechaniker gä, dä het gmeint, es chäm öppe uf 800 Franke, dä la zwägmache (Fründschaftspriis, ohni Arbeit, Material zum Achoufspriis, auso wenis ire Garage würd mache, chäms öppe zwöimau so tüür...). Itz het aber mini Tante e 20 jährige Saab 9000 Turbo, wo nume öppe 160'000 kilometer het u schüsch no guet zwäg wär. Itz tüemer dä no mau aluege, u wes rändiert, bi däm dr Service zmache, nimi dä... Mau luege...!

[Permalink]

Hüt hani agfange, d Ross a ds Weide. Das heisst, i hase einzeln für ca. 20 Minute uf d Weid gla. D Ross hei e sehr empfindleche Mage, drum mues me se langsam wider ads früsche Gras gwöhne. D Lola u d Sally hani am Morge useta, am Nami tueni de no dr Harry u dr Pit. Glichzytig tueni de afang eis vo de 2 Bänkli striche. Ds "Lothar-Holz" Bänkli isch no nid behandlet, u das tueni itz de no mit emne Schutzlack überzie...   

Hinech heimer es Konzärt mit dr KMB, i hoffe, es längt mer rächtzytig da ds si... Am 18.10 Uhr wär scho d Prob, aber uf die längts mer äuä de grad nid. Aber hoffentlech ufs Spaghetti-Ässe, wo när am 18.30 isch (ha nämlech de denn scho Hunger)...! 

[Permalink]

Hüt chumi ändlech wider mau drzue, chli öppis da ufds schribe… Ha ir letschti grad chli Müeh gha mit dere Site, irgendwie hani die nümme chönne bearbeite. Uf au Fäu hani se itze nöi gmacht, itz klappets hoffentlech wider…

Geschter hani Geburi gha! I ha gschaffet, u am Abe bini när hei. Ds Mami, dr Papi u dr Sebi sic ho es Bsüechli mache u ds Mami het no e feini Baileys-Turte mitbracht. Mmmhhh, die isch megaguet gsi!!!

Vorgeschter het mer d Sylvia zeigt, wie d Ross ds „longiere“ im Roundpen. Auso es isch nid es normaus Longiere, wie mes schüsch kennt, es isch meh es Dominanztraining. Wär Monty Roberts kennt, weis öppe um was dases geit. Es isch im Prinzip es Join-up, woni när mitem Bailey(ar Sylvia ihres Ross) ha gmacht. Das isch mega interessant, me mues d Körpersignau genau gä, schüsch reagiert ds Ross nid druf. Het mega gfägt!

Itz isches klar: ab 14. Mai wirdeni ds Court si! D Ross wärde züglet, u mir o (auso, mir gö afang ine Feriewohnig, da ja ds Wohnhus no nid usbout isch…)

[Permalink]

So, i ha chli Ferie gha. Vom 8. bis 12. April simer ir Länk im Musiglager gsi (mit dr KMB). Probe, probe u nomau probe isch ds Motto gsi. Aber o dr Spiunamitag isch nid ds churz cho.  

 D Ufgabe, womer füre Unterhaltigsabe hei müesse löse, si guet gsi, aber schwieriger zum organisiere aus me het dänkt (ha im ganze Trompeteregischter vor Musiggseuschaft Länk umetelefoniert…)

Geschter am morge am Sinbi bini wider aträtte, D Sylvia isch no bis am Nami da gsi, auso heimer am Vormittag dr Lola u dr Sally no d Huf usgschnitte. D Sylvia het das vor Huforthopädin chli glehrt, so dass si das itz zwüschdri säuber cha mache (chunnt chli biuiger…). Es isch chli asträngend gsi, di Huf uf ds ha, vorauem d Sally het sech eifach nid chönne stiu ha…

Geschter Abe (so um di Achti) hei ds Mami u dr Sebi churzfrischtig entschlosse, mi cho ds bsueche! Das het mi auso mega gfröit! Si si es Kafi cho nä, u i hane natürlech no chli dr Stau u d Wohnig zeigt! Es isch schön gsi, si si schnäu cho, de bini wenigschtens nid dr ganz Abe elei gsi…

[Permalink]

Geschter Morge hani grad chli Stress gha. Ha irgendwie u lang im Stau gha, i weiss o nid wasi ha ghüeneret... När hani ar Sylvia no schnäu ds Outo usgsugeret, wüu si het dr ganz Tag ununterbroche Rittstunde gä. U da mer i ihrem Outo Bäsene u Fueter glade hei ga für uf Court zbringe, isch dr Chare chli verdräcket gsi. 

Am Mittag bini relativ schnäu fertig worde, ha o pressiert, dasi no ads Geburifeschtli vor Renate ha chönne!

Am haubi füfi bini de ds Gümlige wider losgfahre, dasi am füfi ha chönne dr Stau mache.

Hüt morge bini o relativ schnäu fertig worde (ha 2 Stung gha...) Normalerwiis heig me nume ei Stung am Morge, aber i hüenere so viu dsume u vergisse wider hie öppis u da öppis, dasi aube chli länger ha... Aber d Routine chunnt de öppe o gli, u de geit de das im Hui!

[Permalink]

Sit geschter Mittag bini eleini ufem Hof. Das heisst, itz bini deheime, ds Gümlige. I ha churzfrischtig frei übercho abem Mittag.

I bi grad am Stau mache gsi, öppe zwöufi isch grad gsi, womer d Sylvia alütet und seit, dass am Samschitg Nami immer e Gymnasiastin vo Fribourg chunnt. Di tuet am Nami aube rite u am Abe macht si aube dr Stau aus gägeleischtig. D Sylvia het mer gseit, i chönni auso hei u morn morge wider cho, weni wöug. Da hani natürlech nid nei gseit!

Aber zersch hani no wöue rite, wesi mers geschter scho het vorgschlage! Auso hani d Rashida gsattlet (ar Nicole ires Ross) u bi no es Stündli ufem Ritplatz ga rite. Ga usritte hani no nid grad wöue, i mues mi zersch e chli ad Westernrittwis gwöhne us no chli lehre... Aber es het hölle gfägt!
U itz bini deheime u bi grad am Föteli ufelade...

[Permalink]

Mi zwöit Arbeitstag u scho eleini ufem Hof!!! Geschter Namitag heimer no Stroh glade, wo d Nicole u d Sylvia hüt uf Court hei gfüehrt. D Nicole u ig hei zäme no dr Stau gmacht hüt morge, u nachem zmorgeässe, öppe uf di nüne, si si när losgfahre Richtig Court (ca. 1.15 h Fahrt). Am Mittag hani när müesse d Ross id Usläuf tue (eleini!), resp. die wo si duss gsi hani inegno, u die wo dinn si gsi, hani id Usläuf ta. Zum Glück isch im Tenn e Tafele, wo zeichnet isch, weles Ross i wele Uslouf chunnt!!! Schüsch hätti se mega vertuschet. Mittlerwile kenni aber d Ross (i weiss, weles wie heisst), isch no praktisch...

[Permalink]

So, hüt morge am Sibni bini hie aträtte... Mi erscht Vormittag hani hinger mer. Mir hei dr Stau usgmischtet; 8 Ross si no da. När heimer vo zwene Stäu müesse d Gummimattene usenäh u die afang absprütze, dass de die zwäg si zum Zügle. I ha ar Lola no dr Schweif gwäsche, dä het chli dräckig usgseh...

 D Nicole het gmeint, di Wuche heigmer nid so viu ztüe; mir hei am Nami eigentlech u lang "frei", eifach Zyt für ds Internettle, usruihe, Feni luege... Aber ab nächscht Wuche wärdi sicher meh loufe, unger angerem o, wüui meh oder weniger eleini wirde si hie ds Schmitte. D Nicole, d Sylvia u dr Mario wärde in Court si, d Nicole wird dert zu de ca. 7 Ross luege, wosi übernäh, u di angere zwöi wärde ds Hus umboue, dases chli wohnlech wird...

[Permalink]

So, geschter, dr 24. März 2006, hani mi letscht Arbeitstag bir Privera gha. Znüni vorbereite, Ustrittsgspräch u Abschied nä... Es het mi auso scho chli bruucht, es si aues u cooli Lüt!!

Itz hani no chli frei (u bruche di Zyt unger angerem o für di Homepage ds ersteue), u när, am Mitwuch heissts de: am Morge am Sibni im Stau stah u mischte...!

[Permalink]