So, itz hani während de letschte drü Täg dr Füürwehr Grundkurs gha. Isch ja mega guet gsi! Es het u gfägt, vor auem aber o wüu mer sone Hammer "Klasselehrer" gha, dr Markus Sulzer. Är schaffet bi dr Bruefsfüürwehr Bärn u isch o no ir Füürwehr Worb. Är het eim di Materie locker überebracht u het eim motiviert. Mir si e u gueti Gruppe gsi, zwe Froue, u mir si ungerenang super ds schlag cho u hei enang guet ghoufe.

Leitigsdienscht, Motorsprütze, TLF (Tanklöschfahrzeug), LRSM (Lebensrettende Sofortmassnahmen), 3-fache Brandschutz (BS) u 3-fache Löschagriff (LA) si nume es paar vo dene Lektione, womer hei gha. Zwüsch düre hets no es paar Demos gä, wo dr Kusi u dr Weber Chrigu aues hei gä (bubele fägt haut scho, o für äuteri Ching...), z. B. wi Flying Angels usgseh, oder was bimne Flash Over passiert... Isch auso mega interessant gsi.

Bire letschte gmeinsame Gruppeüebig simer zwe Klasse zäme gsi u hei e Üebig düregfüehrt mit Rette, 3-fache BS und LA u Lösche (ab TLF u ab Hydrant). Das heimer aui guet gmeischteret...

Nachemne letschte Klasseföteli heimer när ds Abträtte gha u dä Kurs isch für üs düre gsi. Dr Kusi het während de ganze drü Täg ständig gfötelet. Mir überchöme de e CD mit dene Biuder, ha aber ke Ahnig, wenn das die chunnt...

Nächscht Samschtig hani de mini erschti Üebig ir Füürwehr Muri-Gümligen, das isch de grad d Houptüebig... Naja, mau luege wi de das usechunnt...

[Permalink]

Yeah, i has gschafft! Isch o gar nid so schwierig gsi. Theorie hei si nis nid viu gfragt, ds Ritte isch (o dank em Baily) mega guet glöffe... Was wosch no meh? Itz tueni mi chli erhole, damit i füre Füürwehrkurs, wo vom Mäntig bis Mittwuch duret, zwäg bi. Bi gspannt!

[Permalink]

So, hüt bini uf d Free Mountain Ranch ga schaffe. Da scho gli ds Brevet nache isch (am 21.10.06), hani "mis" Sattuzüg mau richtig putzt. När hani no au di Zügu u Zöimli, wo d Sylvia vom Zügle här no verpackt het gha, uspackt u o aui gwäsche u gfettet. Het u mega viu ds tüe gä, aber itz isch ämu aues suber!

Ds Showhalfter vom Baily heimer o gfunge. Das isch mega schön, auerdings sicher öppe 3 Kilo schwär!!! Nei, scho nid grad. Aber mit däm ganz Siuber u Bling Bling dranne, isches auso scho schwerer aus es normaus Stallhaufter...

Am füfi hani när no e Rittstund gno. D Claudia hätt e Privatlektion gha, aber si het mir gseit, i söu doch o grad cho. Auso hei mir zwöi üser früsch putzte Sättle packt u si ab id Halle. Bim Usrume vo de aute Zöimli isch ono es Bosal fürecho (e spezielli Zäumig ohni Trense/Mundstück). D Sylvia het gseit, i söu doch mau das probiere. U es isch mega guet gange!!! U vorauem gsehts u schön us am Baily..... Wes am Samschtig im Gruppetraining o so guet geit mit däm Bosal, de brucheni das für ar Brevetprüefig! Aber äbe, zersch mau luege wis nächschts mau geit...

[Permalink]

So, i ha wider es Intensiv-Weekend düre... I bi tüchtig am lehre für mis Western-Bronze-Brevet. I bi scho mega ufgregt, i wett scho, dass aues klappet!

Aber im Momänt hani grad chli schwierigkeite mitem Bailey (ds Ross woni ritte). Geschter abe isches zwar no guet gange, aber hüt hani ne wider nid richtig chönne agaloppiere. U är isch äbe es mega Schlitzohr, är nützt jedi Glägeheit us, aues grad angers ds mache, aus dasme eigentlech vonim verlangt. Drum muesi immer dranne blibe u darfmi nid chli "zrugglehne"...

I hoffe, es chunnt de guet. Itz heimer no nächscht Sunntig d Houptprob, es Gruppetraining, u när, am 21.10.06, heimer de d Prüefig. Itz muesi no d Theorie guet aluege u lehrä, u am Fritig oder Samschtig gani de no ga ritte, mues das auso schono chlei üebe...

Am Mittwuch gani ga schaffe ufe Hof, mir tüe di ganze Sättle u Zöimli wo am Brevet brucht wärde, putze u zwägmache...

[Permalink]

Hüt hani mi nöi Job bir VSF (www.vsf-mills.ch) agfange... Isch auso scho wider e mega Umstellig! Mi dünkts, es sig länger aus 6 Mönet här, woni imne Büro bi ghocket...!

Dr Chopf brummt mer, hüt isch meh oder weniger aues Theorie gsi, womer d Fabienne, mini Vorgängerin, erklärt het... So richtig d Zämehäng hani no nid so im Griff, weis no nid so, wasi de genau überhoupt mues mache. Aber das gsehni öppe de...

[Permalink]

Mmh, scho lang här sit mim letschte Itrag.... Aber es het sech o einiges ta...

Am 19. Ougschte hani mi "letscht" offiziell Arbeitstag uf dr Free Mountain Ranch gha... Im Hus heimer no d Badzimmer-Wänd vorbereitet für ds Plättle (jaja, das Hus isch immer no nid fertig umbout...), u am Abe si d Sylvia, d Claudia, dr Urs u ig dick ga znacht ässe.  Itz chani miner Ferie gniesse...

Am Tag nächär, am 20., bini mini Diva ga abhole. Am 10.00 Uhr hani mit dr Andrea (d Vorbsitzerin) bir Post ds Studen abgmacht (dert wohnt grad ihri Schwoscht). Lang heimer no gredt u si het sech vor Diva verabschiedet. Dr Abschied isch ihre aber gar nid eifach gfaue. Woni bi losgfahre het d Andrea mega grännet... Mir si auso o fasch d Träne cho... D Diva aber het gar nie grännet, oder de het si sech zäme gno u nume denn ta, wenis nid gmerkt ha...

Sithär isch scho wider e Wuche vergange u d Diva het sech prima igläbt. Letscht Weekend het si aber zu mim Papi id Ferie müesse, wüu ig im Probeweekend mit dr Gugge bi gsi. Dr Papi het aber mega fröid gha u isch Samschtig und Sunntig öppe zwe, drei Stund mitere use ga spile; das het ihre natürlech o super gfaue!!!

I ha itz d Zuesag zure Steu übercho. Am 18. September tritt i mi "Dienscht" bir VSF (Vereinigung Schweizer Futtermittelfabrikanten, www.vsf.ch) a. I wirde für 70 % agstellt si, das heisst, drü Täg ir Wuche schaffeni dert, ussert während 6 Wuche im Jahr (we e Arbeitskollegin Ferie het), wirdeni 100 % schaffe. Das isch no gäbig, de hani zwe Täg ir Wuche, woni glich no uf dr Free Mountain Ranch cha ga schaffe! I bi froh, hani so e Steu gfunge, woni d Arbeitszyt relativ flexibel cha irichte...

[Permalink]

Hüt hani ändlech wider mau chli ar Homepage baschtlet. Ha geschter u hüt frei, so ds säge mis Wucheändi...

Ir letschti isch viu gange uf dr Free Mountain Ranch, aber so langsam chunnt dr Alltag; mir si froh, wüu bis itze isches hektisch zue und här gange, no vom Zügle här.. Ds Wohnhus isch immer no nid fertig, mir hoffe, es wärdi uf Ändi August (ändlech) fertig.
Da es di letschte Wuchene so mega heiss isch gsi, heimer nid viu gschaffet. Nachem Mittag simer aube für nes paar Stund id Badi, chli ga lige, u nis abchüele. Tuet aube mega guet! Aber bi dere Hitz chame nüt angers mache... Sogar ir Halle isches mega tüppig u dr Schweiss louft eim nume abe...

Dr Titeuf, d Clémantine und d Milky Way wärde nis uf Ändi Juli wider verlah, di gö hei zue.

D Elly, em Mario sini nöi Stuete, het sech bi üs guet igläbt, aber mit dr Sally versteit si sech no nid so guet. D Sally wott äuä eifach ihre Platz verteidige. Dr Harry isch dr Schlichter u steit eifach immer zwüsche dene beide "Zickene". Är het uf dr Weid scho mängisch eine ads füdle übercho, wüu di zwöi Froue wider zicklet hei...

Es si zwöi jungi Froue cho schnuppere, wo wette zu üs cho schaffe. D Sarah, vom Hasliberg, isch 21 und het grad d Lehr aus Gärtnerin abgschlosse. Si wird uf Ändi August afa.
D Coralie, chunnt vo Les Diablerets, isch 17 und het ds 10. abgschlosse. Si wird uf Mitti August afa.
I ha vo Mitti August a Ferie, u wirde ab Septämber no 40 % ufem Hof si...

So, das isch öppe so ds aktuellschte, was bi üs so ablouft... I gniesse itz no chli mi frei Tag!

[Permalink]

Ha scho lang ke Itrag meh gschribe, aber äbä, mir hei geng no ke Internetaschluss...

Itz heimer insgesamt 15 Ross im Stau. Es eigets isch no drzue cho. Am Mario sini Stuete, d Elly (Radical Fashion), isch letschte Donnschtig vo de ehemalige Bsitzer Björn und Antonia Kurzrock ("High Chaparral Quarter Horses", Wehretal, Deutschland, www.kurzrockqh.com), uf Court gfüehrt worde.

Dr Autag het sech scho fasch igschliche bi üs. Es si zwar no verschidenschti Sache ds mache, (Huus, Riterstübli...) aber schüsch isches eigentlech ruhiger worde...

[Permalink]

Isch scho lang här, dasi ds letschte Mau ha gschribe... Da mr no nid i "üsem" Hus wohne, heimer äbe no ke Zuegriff ufs Internet, drum chani nume schribe, weni deheime bi...

D Nicole het nis am 31. Mai verlah, itz bini (no) di einzigi Praktikantin. D Sylvia het aber ir Tierwelt e witeri Praktikante-Steu usgschribe. Es brucht auso schono öpper, wüu itz heimer mittlerwile 14 Ross im Stau, u we öpper vo üs zwöine frei het oder so, gits mega viu ds tüe eleini...

Mir hei am 29. Mai di letschti Ladig vo Schmitte nach Court züglet! Ändlech isch aues a eim Ort!!! Sit denn bini itz o immer ds Court.
Di letschte Täg isches geng mega grusigs Wätter gsi; hüt heimer zerscht mau wider chli Sunne gha; das tuet mega guet!

Ds "Gschäft" louft, d Sylvia git viu Rittstunde und letscht Wuche si grad drü Ross cho; ei Pensionär u zwöi Usbiudigsross (d Sylvia tuet die usbiude). Im Juli chunnt de no es dritts Usbiudigsross...

I ha mittlerwile o wider meh Zyt zum Ritte. D Sylvia het mer o scho mehreri Rittstunde gä, si het gseit, wemer dranne blibe, längts mer guet bi ihre im Herbst ds Brevet chönne zmache. Das wär ja geniau, weni das würd schaffe!

So, itz gniessi miner zwe freie Täg!

[Permalink]

So, itz simer am Stau usrume u useputze. Hüt morge hani ds Riterstübli (Chuchi mit Ässberich) useputzt; das isch wenigschtens afang erledigt. Di Chuchischäftli useputze git hölle viu ztüe!!! Itz putzi de no ds WC ud Duschi bim Stau, när chunnt de ds Tenn dra. Dert gits no u viu zum furtschiesse. I hoffe, d Mulde chunnt öppe de, das mer de hüt Nami, we d Sylvia o da isch, chöi Züg furtschiesse, womer nid wei zügle.

Mir hoffe, das mer hüt no guet vorwärts chöme, wüu morn gömer mau uf Court. I weiss no nid genau, obi de grad dobeblibe bis am Fritig, oder obi de wider abechume; gsehmer de....

[Permalink]

So, itz hani doch am Weekend frei, u nid, wi eigentlech bis geschter planet, am Mäntig u Dsischtig. De chani doch no a Bärtschihusmärit!

Geschter heimer d Ross uf Court züglet. Das isch no e Sach gsi!! Di erschti "Ladig" isch gäbig gange; dr Spaicy, dr Pit u d Lola. Di si ohni ds zögere i dä Hänger ine. Ds Beschte isch, di Ross si no nie i däm Hänger gsi, isch auso mega erstundlech gsi, dass si so schnäu ine si. När simer mit däm mega Gfährt Richtig Court gfahre. Nach 1.5 Stund simer acho u d Nicole het nis scho sehnlechscht erwartet.

Dä Hof isch auso mega cool, ds Court! Es isch zwar de chli witlöifiger aus ds Fillistorf, drfür heimer de o meh Platz. Ds Wohnhus isch no gar nid fertig, aber mir chöi ja afang im Dorf unger ir Feriewohnig vor Claudia wohne, wo übrigens mega schön igrichtet isch...

Auso, nachdäm das mer di Ross hei usglade, u d Sylvia mit mir schnäu e Füehrig dür ds Hus gmacht het, simer äbä zur Claudia, wonis scho het Pizzas i Ofe ta. Gmüetlech heimer zmittag gässe u si när wider Richtig Hof. D Claudia, d Sylvia u ig si de wider nach Fillistorf gfahre, für di zwöiti Ladig Ross idslade.

Hie heisech aber de grösseri Schwierigkeite ufta... Mir hei ds Fillistorf no Material i d Absteuchämmerli vom Ahänger glade, u öppe uf di haubi Sächse heimer agfange, d Ross idslade. D Sally isch no eifach ine, dr Harry isch ono gange, aber när isch no dr Baily cho... Är isch eifach immer wider rückwärts use... Mir heine probiert ine ds locke, aber är heit eifach nid wöue. När heimer dr Harry usegno u hei dr Baily a zwöiter Steu wöue häretue, aber o dert heter nid inewöue... Es mega Züg!!! Am haubi Sibni het du d Sylvia gseit, i söu ga, da i ja am haubi Achti Prob ha. D Claudia isch ja no dert gsi wo het ghoufe....

Schlussändlech bini öppe füf Minute ds spät id Prob cho, u i weis itz no nid, ob si ds Court si acho, oder ob si immer no dran si am ilade...

[Permalink]

So, hüt tueni no chli d Ross putze u zwägmache, dass si de füre Transport morn nid so dräckig si! Git auso scho grad chli ztüe... Putze, strigle, Mähne u Schweif strähle, Schweif zöpfle.......

Im Momänt tueni grad im Internet e Badwanne sueche für d Sylvia. Si het da eismau eini gseh wore würd gfaue, u itz het si mi gfragt, obi chli Infos im Internet chönn sueche. D Sylvia isch grad ds Court, si isch hüt zMittag mit Material gfahre.

[Kommentare (0) | Permalink]

So, di Wuche isch di letschti hie ds Fillistorf...
Am Fritig tüemer d Ross definitiv zügle. I schaffe sit geschter u bis am Sunntig, wobi i nonid weiss, woni de am Samschtig u Sunntig schaffe. Obi de hie no chli tue d Stäu useputze u schüsch no packe, oder obi de scho ds Court schaffe; das müessmer no luege.

Ds Wohnhus wird definitiv nid fertig bis Ändi Mai. D Möbu u aues zäme tüemer de afang im Tenn verstoue, bis aues usbout isch. D Sylvia u dr Mario müesse itz no für ei Monet e Wohnig sueche; isch nid grad so liecht...

Itz hani de chli meh a de Weekends frei, aber o no nid grad jedes... Isch chli blöd, aber mit dere ganze Züglerei geits haut nid angers. Wesech de aues chli ipändlet het, geit de das scho.

[Kommentare (0) | Permalink]

So, geschter u hüt hani frei (gha). Geschter vormittag het dr Stöffu no wöue ga Zigis choufe a Bahnhof, u i ha gseit, i chöm doch o grad mit. Ufem Heiwäg heter när vorgschlage, mi chönn doch schnäu ids Fähribeizli eis ga zieh (da är ja Pikett het gha, heimer nid us dr Gmeind törfe, u mi Vorschlag, ufe Däntsch ga ds loufe isch o nid Hammer gsi, da är ja nid ir Nöchi vom Chare wär gsi, wes hätt ghornet...). Auso mir si ad Aare abe i d Fähri, u de heimer grad es Forällefilet gässe! Isch mega schön gsi!
Am Nami simer när zum Bänz ga "Buzz" spile, mega luschtig!!!   

Hüt hani no glettet (wääääähh...), u itz gani de uf Bethlehem mitem Bigi ga zmittag ässe, när gani diräkt id 3M-WG zum Hüdu. Hüdu, Gonsi u ig hei eigentlech id Waudhütte wöue, aber da es im Momänt so nach Räge usgseht, weisi de nid öb mer de effektiv gö. Schüsch blibe mer de haut chli ir WG... När hätti eigentlech no vorgha, ga Blüemli ds choufe füre Baukon.
Am Abe isch när di Rekrutierigs-Veranstaltig vor Füürwehr, da gani de ono (bi ja schliesslech ufbotte worde).... 

[Permalink]

So, mi Heckschibe-Chläber hani kouft! Dä isch mega gross, i hoffe eifach, är ma de uf d Schibe. Has no gar nid teschtet... Aber äbe, i warte zersch no, was mit däm Saab isch... Das chunnt de nächscht Wuche us. 

I de letschte Täg hani chlei viu ds tüe gha. Vorauem dr Ahänger mit Material zum Zügle ds lade, git mega ds tüe. Dä het viu Platz!! Bi eifach aues am userume, was mer hie nümme bruche, wobii, i weiss säuber aube nid so, was i aues söu ilade... Ab hinech hani "Wucheändi", das heisst, Sunntig u Mäntig hani frei. När schaffi bis u mit Sunntig, 15. Mai, u när hani äuä wider zwe Täg frei. Isch mega müehsam, am Wucheändi ds schaffe, aber das änderet sech öppe de o, wemer de züglet hei...  
Im Momänt bruchts mi o hölle, auso, i ha eifach mega Heiweh... Hätt nid dänkt dases so schlimm isch... Aber das änderet (hoffentlech) de o, weni de nid dr ganz Zyt immer eleini bi... 

[Permalink]