Bsuech vo mine Nichtene...
Von meligoeswestern, 16:44

Geschter (Sunntig) bini ds Rüschegg gsi. Am Vormittag bini ids Bedli ga ritte mitem Käthi u mitem Bidu, ha dert no öppis zmittag gässe u bi när i Eywald zu de Eutere. Dr Roger, d Isabelle, d Marie u d Charlotte hei es Bsüechli gmacht.

Di zwöi Meitschi hei wider mau mega fröid gha, mi ds gseh u simer dr ganz Zyt aghanget u hei nume mit mir wöue spile. Mir hei no imne Malbüechli öppis usgmaut, wo d Marie plötzlech mit em Fiuzstift mis Canada-Tattoo usgmaut het... Jaja u plötzlech hani beidi Arme gaaaaanz farbig gha...! Zum Glück hani niene meh häre müesse, di Lüt hätte ja dänkt was das söu....

[Permalink]

Geburtstagsfescht Dänu Flückiger
Von meligoeswestern, 09:30

Am letschte Samschtig het dr Dänu Flückiger - dr Gmeinds-Chemifäger, Vizekommandant vor Füürwehr, Sousispiler bi de Chlepfschytter..... - si Geburtstag nachegfiiret (är het nämlech scho im Februar gha...)

Es isch - wi immer bi Flückigers - es mega guets Fescht gsi, mit viu Pizza u Alkohol, aber mega luschtig...!

Mir hei mit üser Füürwehrband, the Schlauchs (jaja, itz hei di o no e Schlauchine, wo sogar de es eigets Mikrofon überchunnt) zwöi, drü Liedli gsunge, u dr Dänu het ämu Fröid gha...

Dr Ädu het mer (wider mau) zeigt, wi dr Lindy-Hop Grundschritt geit(www.lindy-hop.ch); dr Ädu isch da e sehr kompetänte u verständnisvolle Lehrer... Es isch e mega fägegi Art ds Tanze (dr Lindy Hop isch i de 30 Jahr aus erschte Jazztanz entstande u wird zu Swing tanzet.)
Merci Ädu...!

Es isch ämu spät worde bis di letschte (Tina u Disu, Mümmel, Stucki Ädu u ig...) hei si...

[Permalink]

FMR - Bsuech vor Nicole
Von meligoeswestern, 15:08

[Permalink]

Hochzeit Naschi, 11.08.2007
Von meligoeswestern, 15:09

So, itz isches sowit, ds Naschi, mi Cousine, isch unger dr Hube!

Am letschte Samschtig heisech ds Nathalie u dr Michael Kohli-Stoll ds Jawort ir Chiuche Rüschegg gä. Am Tag vorhär sisi ufem Zivilstandsamt in Schwarzeburg gsi.

Nach dr Trouig, wo dr Michel Wuillemin (dr Pfarrer, wo di beide im 2001 zäme konfirmiert het) wieder emau wunderbar gstautet het, isch ds Brutpaar mitere Strech-Limousine abholt worde u mitere Kilometerlänge Autokollone hinger nache über Mamishus Richtig Stösseried gfahre. Dert isch ds Apéro scho vorbereitet gsi.

D Céline, d Schwoscht vom Nathalie, u dr Andreas, dr Brüetsch vom Michi, si Trouzüge gsi u hei dr ganz Tagesablouf vou im Griff gha. Mi Papi het gfötelet, während däm d Céline dr Tagesplan ir Hand het gha und dr Reihe nach ufgrüeft het, wär mitem Brutpaar uf ds Foti mues...

Am Abe simer när ids Rest. Eywald ga Znacht ässe. Nach diverse Showilage (vor Tanzgruppe, wo ds Naschi drbi isch, bis zu improvisierte Gsangsilage einisch vo de Männer, när vo de Froue), isch de dr Tanz vom Brutpaar dranne gsi. Si heis ganz guet gmeischteret, für dass si nid so guet chöi tanze...

D Brut het natürlech es mega schön usgseh, aber o dr Bräutigam isch e schöne gsi!

Edit: Übrigens, i ha dr Brutstruss gfange...........

Ds Brutpaar mit ihrne Vättere (Pole, Vater vom Naschi, Wali, Vater vom Michi)	Ds Naschi am posiere	D Eutere vor Brut u d Trouzüge (v.l.n.r.: Pole, Céline, Gotti Siau, Ändu)

[Permalink]

Musigreis 04.08.2007
Von meligoeswestern, 14:48

Dä Itrag chunnt chli verspätet; aber är chunnt!

Am 4. August 2007 heimer e Musigreis gmacht. Mir heinis am 11.00 uf dr Schütz troffe u si abgfahre Richtig Schönried. Nachemne Churz-Ichouf ir Raschtstätt ds Münsige heimer e amüsanti Fahrt gha. Ds Schönried acho, simer mitem Gondeli ufs Rellerli ufe.

Dert obe heimer chönne rodle u karte, was das Zeug hält! E mega Rodubahn (wome nid auzuschnäu abe sött, gäu Kusi...) u e "Deval-Kart" Bahn, wome mitemne Pseudo-Kart dr Hoger abfahrt - mega luschtig!
Me het sogar kennegi Lüt troffe ufem Rellerli - dr Stucki Ädu (eine vor Füürwehr) isch mit sine Kollege mitem Bike ufegradlet (lieber är aus ig...)

Es paar wagemuetegi (drunger o ig) hei när am haubi füfi mit dene Deval Karts d Talfahrt gmacht... Mir si chli nass u dräckig worde, aber es het sech mega glohnt!
Es angers Grüppeli het d "Talabfahrt" unger d Füess gno u isch abeglöffe.

Nachdäm mer aui dunger si acho, simer zrugg nach Bärn gfahre. I bi äbe när diräkt a Polterabe vom Naschi, drum bini am Abe nüm drbi gsi. Si hei aber no ar Aare imne Boccia-Club brätlet, gspiut us dert no luschtig zäme gha...

Hie es paar Biudli

 

	Rächts u links di Deval-Karts, unger rächts u links d Rodubahn, u ir Mitti di schöni Ussicht uf Gstaad abe... Mega tolls Wätter heimer gha!

[Permalink]

Wasser, Wasser, u nomau Wasser, 8.+9.08.07
Von meligoeswestern, 12:04

Letscht Wuche isch rächt heftig gsi mit Wasser... Me hets i de Zytige ja chönne läse...

O mir (Füürwehr Muri-Gümligen) hei ztüe gha! Am Mittwuch abe hets drmit agfange, dass e Brandmäuder-Alarm nid isch itroffe. Resp. dr Bärtschi, wo extern Pikett het gha, het dr Alarm fasch 7 Minute ender übercho, aus mir im Hus, wone eigentlech aus erschts sött übercho... Item, mir si ga luege, es isch nüt gsi. D REZ (Reg. Einsatzzentrale, die wo dr Alarm entgägenähme u de Füürwehre witerleite) hei Systemproblem gha u d Alarmierig het nid funktioniert... Sehr müehsam, wo doch die Nacht di schlimmschti i dere Wuche beträffend Wasser isch gsi...
Chum deheime, si scho di nächschte Alärm cho: Wasser (was schüsch...)

Mis Programm a däm Abe (resp. bis am Donnschtig namitag!):

- Zersch Muri-Bad, scho ds spät, Wasser vor Aare isch scho im Bad.

- Witer zur Fähri-Beiz, Sandsäckele, Wasser chunnt scho übere Wäg u über ds Brüggli. 23.00, dr Kommandant schickt mi une angere hei, da mir am nächschte Morge wette ga schaffe.

- Heicho, aber grad wider witers! Wiesestrass: Wasser usere BKW-Leitig (auso usem Kabelkanal), niemer weiss wohär u wieso. Auso, eifach suge, suge u nomau suge...

- Ca. am 03.00 hei, wüu i glich no chli hätt wöue schlafe, bevor i am haubi sibni wider uf mues für ga ds schaffe...

- Nüt gsi mit "lang" schlafe: 5.27 dr nächst Alarm. Wasser ir Weiherstrass. Dr Stöffu u i gö ga luege. Es Doppueifamiliehus, im einte Chäuer Wasser, im angere nid. Auso Wasser usesuge. Zwüschdri schnäu ir Bude alüte, dasi nid chöm cho schaffe.
Da immer Waser dür ds Chäuerfänschter inecho isch, heimer mau Pumpine i Schacht vor Sickerleitig ta (ds Wasser het vor Sickerleitig zrugg i Chäuerfänschterschacht drückt).

- Ca. 09.30 fertig gsi mit däm Chäuer usesuge. Plötzlech chunnt die vom angere Chäuer: Nid guet, Wasser louft itz o bi ihre ine, wott nid höre...
Grund: Ds Wasser isch vom Fäud näbedrann cho. Es het niene möge abloufe u es isch ei riesige See gsi ufem Fäud u i ihrem Garte.

- Dr Rüedu isch mit dr grosse Pumpi cho für ds Fäud absuge. D Irichtig i de Chäuer isch nüm ds rette, mir "chessele" chli Wasser use, dass dr zwöit Ruum nid ono "überfluetet" wird. Aber meh chame nid mache...

- Dr Oli ("Gmeinds-Gärnter", nid ir Füürwehr, aber kennt jede u isch e guete Kolleg) bringt nis afang öppis z Znüni unes Kafi - meeeeeerci Oli!!!

- Ca. am 16.15 simer äääändlech fertig mit däm Hus u o mir dörfe hei ga schlafe.

- Am 19.01, bi grad ufgstange, dr nächscht Alarm. Dr Bänz u ig gö ga luege. Wasser im Chäuer - was schüsch... E Pumpi wär installiert, sugt aber nid ab. Schacht uftue, Touchpumpi ine, absuge. Schacht isch läärgsugt, no dr anger Ruum (Ziviuschutzruum, erhöht, drum isch ds Wasser dinneblibe) absuge. Erledigt, Suger abehole, ds räschtleche Wasser absuge - Denkste! Dr Schacht het sech scho wider mit Wasser gfüllt. Touchpumpi wider abe!
Di heimer itz fescht installiert, damit si outomatisch absugt, we ds Wasser ds höch stigt. Di installierti Pumpi het e Defekt, aber dä cha natürlech em Donnschig Abe am haubi zähni nid repariert wärde - Firma informiert, wird am näschte Morge dr Defekt behäbe.

- 22.00 Ändlech firabe, todmüed ids Bett...

[Permalink]

Ride West - 14.07.2007
Von meligoeswestern, 10:15

Es isch scho wider lang här, aber brichte wetti glich churz drüber...

Am 14. Juli 2007 het ds Alterswil bim Oli Fasel (www.ride-western.ch) ds "Ride West" stattgfunde - dr Alass isch ufgrund vom Erfolg vor letschtjährige Tag der offenen Türe igfüehrt worde...

Es hei zwöi Turnier stattgfunde, es Trail und es Team Penning. Ds Interessante dra isch, dass nume Nid-Lizänzierti hei dörfe starte, auso das heisst, wär ir SWRA aus Limited Amateur startet oder höcher, het nid dörfe starte. Es isch auso würklech es Afänger-Turnier gsi, wobi me das a de super Leischtige nid hät chönne erkenne...

I bi am Mittag dert gsi u ha no es paar Starter im Trail gseh, d Rangverkündigung, u när no die erste paar Teams im Team Penning. Es isch mega interessant gsi! Ds Wätter isch o super gsi, es isch zwar fasch e chli heiss gsi...

I ha d Diva im Outo müesse lah, wüu si het sech enorm gäge Muuchorb gwehrt (Alterswil isch im Kanton Fribourg, dert gilt mi Hung aus mega gfährlech u mues drum e Muuchorb trage). Si isch sech eifach nid gwanet, u cha i däm Ding o gar nid hächle, drum isches agnähmer für si im Outo gsi. Überau si Outos mit Dechine bedeckt gsi u d Kofferrüüm si offe gsi - bi auso nid di einzegi gsi, wo dr Hund im Outo het gla...

Team Schaller

[Permalink]

Diva isch abghoue, ha e mega "Horror-Nacht" gha...
Von meligoeswestern, 16:24

Am Dsischtig Abe, 24.07.07, isch mr d Diva ufem Spaziergang eifach abghoue... hie dr Bitrag, woni im Forum www.mein-hund.ch gschribe ha:

ich bin so was von erleichtert!!! ich hab eine mega unruhige nacht hinter mir...

es begann so...

gestern abend bin ich im wald in unserem dorf spazieren gegangen (auf dem dentenberg, gümligen). es ist ein mega weitläufiges gebiet, auf allen vier seiten kann man in ein anderes dorf hinunter.

um ca. 18.30 ist diva plötzlich einen "hoger raufgeklettert". ich dachte, sie hätte angst, weil irgendjemand im dorf unten feuerwerkskörper angezündet hat. diva ist mega ängstlich schon beim leisesten, dumpfen "chlepfen"...

ich dachte, sie käme wieder und bin ein paar hundert meter voraus gegangen, doch sie kam mir nicht nach. ich ging zurück, rufte und machte, kletterte den hoger hinauf und dachte, sie habe sich im gebüsch verschanzt. aber ich konnte sie nirgens finden! zum auto zurück wars 20 minuten fussmarsch, und mein freund hat sein handy zuhause gelassen und war noch nicht von der arbeit zurück.

naja, suchen, rufen, mal leise, mal laut, mal streng, mal animierend... diva kam einfach nicht zurück. mittlerweile holte ich das auto; immer noch keine spur. um 20.30 kam mein freund nach hause, und kam sofort suchen helfen. nichts! passanten haben auch nichts gesehen. ich rief die polizei, resp. tiermeldezentrale an, im fall, wenn sie irgendwo gefunden würde (trägt zwar meine natel-nr. am halsband, aber nicht jeder wagt sich an einen sog. "kampfhund" heran). ich war durchnässt, hatte kalt und war verzweifelt...

dann hielt ein jäger an, redete mir gut zu und beruhigte mich. er sagte, die fände von alleine nach hause.... aber die strecke nach hause sind wir noch nie gelaufen, nur immer gefahren. er empfiel mir, eine decke von ihr zurückzulassen, im falle wenn sie an den ort zurückkäme, und mich suchte. das habe ich auch gemacht.

um 22.30 sind wir dann nach hause, mit umweg durchs ganze dorf... vor der haupteingangstüre habe ich ihr auch eine decke hingelegt. mittlerweile habe ich meiner kollegin, der ich mittwochs jeweils im stall helfe, telefoniert, ich komme später heut morgen.

um 23.45 bin ich nochmals in den wald (uuuu, gruselig...); immer noch nichts!!! ich war langsam am verzweifeln, sah sie schon in irgend einem graben liegen, heulend, verletzt, halb erfroren....

wir gingen zu bett, ich war todmüde, erwachte aber immer wieder. mega unruhig!

heute morgen um 6.20 aufgestanden, runter, keine diva vor der türe, ich immer noch verstört, ging ins auto und fuhr los richtung wald. bin am waldrand angehalten, ausgestiegen, türe zu; und wer kommt da "angetäselet"!?! MEINE DIVA!!!

ich brach in tränen aus, lobte sie bei ganzem leibe, dass sie die decke gefunden hat und hier die ganze nacht ausgeharrt hat und war so mega glücklich, dass ihr nichts passiert ist!

im nachhinein denke ich, ich habe mir zuviele sorgen gemacht. so wie sie heute morgen dahergelaufen kam... gerade so, wie sie mir erzählen wollte, was sie alles tolles erlebt hat diese nacht: "wow, die ganze nacht konnte ich umher rennen, konnte vieles riechen und hab so vieles erlebt!"

ich hatte aber die ganze nacht angst, ihr wäre was geschehen...

naja, horror vorbei, alle wieder glücklich und zufrieden...! gott sei dank!

[Permalink]

Free Mountain Ranch, I'm back!
Von meligoeswestern, 08:59

I hiufe wider regumässig uf dr Free Mountain Ranch us!

I ha mis "Näbejöbbli" ds Salvenach bim Frieseclub ufgaä, dasi ei Tag ir Wuche wider uf Court cha. Nid öppe wüus mr bim Frieseclub nid het gfaue, nei, viu meh, dassi wider meh zum Westernritte chume, u dasi das vorauem no besser cha lehre. I cha eso eifach meh drvo profitiere...

D Sylvia cha mini Hiuf zum Glück guet bruche, i bi im Momänt dranne, ihri ganzi 2006-Buechhautig ds erfasse u ds ufarbeite, da si eifach nie drzue isch cho...

I wirde auso wider vermehrt vor FMR brichte...

[Permalink]

Patrouillenritt & Gymkhana
Von meligoeswestern, 13:36

Am Pfingschtsamschtig hani zum erschte Mau amne Patrouillenritt mit Gymkhana (Parcours ufem Plätzli) mitgmacht. Ds Bedli tuet zwöi Mau im Jahr so eine dürefüehre.

I ha dä mit dr Cindarella gmacht. Di Stuete het no nie a somene Parcours mitgmacht. Bis itz isch si immer nume für ds Usritte brucht worde. O für si isches auso ds erschte Mau gsi. Dementsprächend het si o vor auem Angscht gha... Viu Pöschte u Ufgabe heimer nid gschafft, wüu si sehr närvös isch gsi (isch o chli da dranne gläge, dass si rössig isch gsi). Mir si 70. vo öppe 75 Teilnähmer worde, aber es het e schöni Erinnerigsplakette gä u e Sack vou Leinsamen-Gudelis, woni o ar Diva cha verfuettere...

Es isch e mega schöne Tag gsi u het gfägt. Am nächschte Patrouillenritt im Oktober oder Novämer macheni sicher o wider mit; u wär weiss, vilech wider mit dr Cindlä...

[Permalink]

"Überschwemmige"
Von meligoeswestern, 11:29

Geschter Abe hets plötzlech mega afa rägne. I bi am viertu vor Sächsi hei cho u bi nume churz mit dr Diva use. Ha dänkt, i chönn de länger ga, we dr Stöffu ir Atemschutzüebig isch.

Plötzlech hets mega afa rägne, blitze u donnere. D Diva het das u nid gärn u isch ab id Badwanne (macht si immer wes chlepft...). I hase aber useghout u de isch si nid vo mire Site gwiche; jede Schritt het si mi verfougt. Dr Stöffu het afa Ärdbeeri rüschte (mmmhhh...), wo dr erscht Alarm ine cho isch: Wasser im Chäuer!

Öppe e viertu Stund nachdäm dass är u dr Bänz usgrückt si, hets scho wider gschäuelet. Wider Wasser. Dasmau si aber grad zwe Alärm ufs Mau cho!

Mir si aui ids Magazin abe, wo scho dr Rüedu het gwartet. Innerhaub vo 20 Minute si ca. 6 Alärm igange; überau Wasser ir Wohnig oder im Chäuer. Dr Rüedu het koordiniert u d Gsamtwehr ufbotte, so dass dr Atemschutz di planeti Üebig mit dr Bruefsfüürwehr Bärn doch no het chönne dürefüehre.

I bi mit drüne angerne ines Huus uf Muri (Bonzehütte vom strübere) ga Wasser suge. Auso eigentlech isches meh Dräck gsi aus aues angere. Si hei ds Huus am Hang bout u vom Fäud obedrann isch grad es Bächli gflosse, wo bim einte Fänschter het inedrückt.

Ds verruckte isch no gsi, dass i dere Wohnig sehr sehr wärtvous Züguguet isch umegstange. Riesegi Kunstbiuder vo weis nid viu höchem Wärt si verpackt desume gstange. D Bsitzer hei Gäscht zum ässe gha, si aber plötzlech ganz difig cho di Biuder "rette"...

[Permalink]

so, mäude mi wider mau...
Von meligoeswestern, 18:44

Jaja, sitem letschte Iitrag isch so es wili vergange....

I bi di letschte zwe Wuche am Mittwuch u Fritig aube uf Court, ar Sylvia ga häufe. Resp. d Sylvia isch nid da gsi, drum bini eigentlech gange. D Sarah isch drum itz eleini aus Praktikantin. D Coralie het gloubs ändi Februar ihres haube Jahr düre gha.

D Elly het ihres Fühli übercho, grad genau ar Oschtere. Drum heisi ne o "Easter Rodman Ship" touft (dr Name mues zwar itz no vo dr American Quarter Horse Association agno wärde...). Es isch es prächtigs Hängschtli u het natürlech mega Flouse im Chopf...

Letscht Samschtig (19.05.07) bini mitem Käthi (vom Bedli) i Biembach ga usritte. D Steffi, e Nachbarin vom Hans (Bsitzer vo de Hafis) isch du o grad mitcho. Si wett o wider chli afa ritte u het mitem Hans Kontakt ufgno. Das isch super, si wohnt grad näbedran u het meh Zyt, am Abe mit de Ross öppis ds mache!
Dr Usritt isch luschtig gsi, chli asträngend wüu di Ross eifach vor auem Angscht hei u geng umetänzle. Aber es isch es mega schöns Rittgebiet!

[Permalink]

Doug Mills, wir kommen! 1. Eintrag
Von meligoeswestern, 10:27

Juhui! I ha es Ufgebot übercho! Ha zwar zersch dr Hans müesse frage, ob i mit eim vo sine Haflinger überhoupt darf teilnäh, aber är ungerstützts vou u ganz! Weisch nid, um was dases geit? Klick doch schnäu links uf "My Passion".

So, itz bini am organisiere. I hoffe, i vergisse nüt, u dänke a aues. Eigentlech hani ja no Zyt, aber es isch glich scho i vierzäh Tag, u vo Morn bis am Mittwuch simer no im KMB-Musiglager ar Länk... Auso doch Stress!!!

Ufem Link "My Passion" hani (für die wos interessiert) mi "Pendänzelischte" ufgschautet. Ha mega fröid, dasi a di Vorfüehrig cha, drum muesi das haut aues uf mire HP ufschaute, sorry!

[Permalink]

Ostermontagsritt
Von meligoeswestern, 17:21

So, ha grad gmerkt, dasi ja scho lang ke Itrag me ha gmacht... Das ligt da dran, das im Momänt augemein chli im Stress bi...

Aber itz zum "Wichtige": Geschter, Ostermäntig, si mir (Anita, Hübu, Monika, Jerica, Käthi, Hämpu u ig) ufe Ostermäntigsritt. Dä Ritt isch zwar öffentlech usgschribe gsi, aber mir si immer öppe di gliche, wo enang (wider einisch) träffe u zäme gö ga usritte. Ussert em Hämpu, wo mit sim eigete Quarter mitchunnt, ritte mer aui es Ross vo Schicks.

Mir si auso losgritte, ds Bedli dürab u dürs Dorf Richtig Eygrund, vo dert ufe i Eywald, womer de bir Beiz hei es Pöiseli gmacht u e chauti Platte gässe hei. Mega herrlechs Wätter, Ross, es Bierli, e Schnupf.... Was wottme no meh?

Nachdäm dass mer nis usgrueht hei, heimer nis wider ufe Rückwäg gmacht. Es isch e mega schöne Tag gsi, es riisegrosses Merci a Schicks!!

[Permalink]

Usritt im Biembach
Von meligoeswestern, 19:22

So, hüt simer auso di nöie Westernsättle ga probiere! Isch no chli Action gsi... Mir si zerschte Mau ds dritt ga usritte. Dr Papi uf dr Suleika, dr Hans uf dr Samantha (mitem aute Vielseitigkeits-Sattu u ig uf dr Habanera (di schwierigschti). Wo mer chlei hei wöue trabe hei di drü grad i Galopp gwächslet, aber das hei mir du nid wöue. Wüu plötzlech hani gmerkt, wi mi Sattu uf dr Habanera gäge rächts rütscht. Bi däm Sattu chame dr Gurt nume mitemne spezielle Chnüppu amache, u nid wi üeblech mitemne Lädergurt. Drum hani ne o nid richtig chönne azieh... Aber es isch nüt passiert, u mir heis ämu luschtig gha...

[Permalink]