Verkehrsdienscht ar Fasnacht z Gümlige
Geschter isch z Gümlige Fasnacht gsi. Mit dr Füürwehr simer ga dr Verkehr regle. U i ha grad mitem Füürwehr-Pick-up dörfe umefahre (zersch mau woni mitemne Ahänger dranne Outo fahre!!!).
Es isch eigentlech guet gange, di meischte Lüt hei no so Verständnis gha... Nachem Umzug heimer no eis chönne ga zieh, u es isch du sibni worde, bisi deheime bi gsi. Am haubi nüni bini scho wider zwäg gsi für ads Fescht i Mattehofsaal.
Es isch auso sehr luschtig gsi, uf dr Homepage vo de Chrottegurgler fingt me no es paar Föteli...
"Westernsattel-Kauf"
Hüt, Fritig 9. März 07, bini uf di füfe i Biembach. Mir hei ir Tierwelt gseh, dass öpper zwe Westernsättle (eine für Fr. 400.- u eine für Fr. 800.-) usgschribe het. Da het dr Hans grad aglüte u het usegfunge, dass die Lüt, wo dä verchoufe, grad ir Nöchi wohne.
Mir si auso losgfahre, d Wildenegg ab, u dr anger Hoger wider ufe, über "Waudwäge", mega ids Kaff ufe (aber de würklech Kaff!!!). Womer scho fasch hei wöue umchere, wüu mer hei dänkt, hie cha ja gar nüm cho, isch du es Burehus zum Vorschiin cho...
Mir hei di Westernsättle auso agluegt, u mi het dünkt, dass die super guet zwäg si. Für dä Pris hani auso schlächters erwartet! Di Familie het o zwe Haflinger gha (e äuteri Stuete u e drüjähregi). Dr Sohn, dr Thomas, het di äuteri ufegno, hetere dr Sattu drufta u het gseit, i söu schnäu drufhocke; är näm de di Jungi o schnäu ufe. U de simer schnäu es haub stündli ga usritte. Mega schöni Wäge!!! Är rittet äbe ohni Sattu, drum heisi di zwe wöue verchoufe; bi ihne ligesi eh nume im Wäg, heisi gmeint...
Womer si zruggcho u d Ross versorget hei, si di Herre scho im Kafi ghocket u hei dr Handu scho abgschlosse gha. Mir hei, nachemne Kafi u es paar Güetzi, auso di Sättle ids Outo packt u si zrugg...
Am Sunntig gani se de ga usprobiere, i bi gspannt, wi d Habanera u d Suleika reagiere...!
Atemschutz-Schnupperüebig
Geschter Abe si mir drü "Nöilinge" ir Füürwehr (Isa, Fidu u ig) ad Atemschutzüebig. Mir wäre au drü interessiert i AS zga, u drum heimer mit dörfe.
Dr Grütter Tinu het mit üs chli absyts vom Gscheh (vor eigentleche Üebig imne Abbruchhuus) ds Grät agluegt, het nis aues erklärt u glichzytig verzeut wis ablouft ire Üebig oder im Isatz.
Zerschte mau di Maske adslege isch scho chli heavy, me mues ar Technik scho chli vertroue, ämu ig, wo schnäu Platzangscht überchume... Mit chli Überwindig hani di Maske aber o agleit und, siehe da, es isch Luft cho!
Mir si zersch mau chli ir Gägend umegloffe, das mer üs ads schnufe im Grät gwöhne. Aschliessend simer aber o ids Huus, womer zwe lääri Rüüm hei "abgsuecht". Das heisst, es isch no einigermasse chli häu gsi, so dasmer glich no hei gseh, womer häreloufe. So für ds erschte Mau isch das no gäbig...!
Zrugg im Hof heimer natürlich o d Retablierig düregspiut, das heisst, ds Grät wider betriebsbereit mache (Fläsche uswächsle, Maske uswächsle...).
Es isch mega interessant gsi, u i bi überzügt, dass mir üs drü aui a Kurs amäude. Es git aber no e chlini Hürde: Dr Fitness-Tescht bim Vertrouensarzt... Naja, i dänke, dä wärde mer o überstah, i ha de chli meh Schiss füre Kurs, wemer durch ängi Gäng u Rohr müesse schnaage, i absoluter Dunkuheit... 
Aber da di nächschte paar Kürs (leider) scho usbuechet si, wird das ersch so im Novämber si...
Glückselige Fasnet - Ewigi Liäbi...
So, am Sunntig simer ds auso ds Neuenburg am Rhein ar Fasnacht gsi. Ds Highlight vom ganze isch natürlech d Carfahrt gsi... 
Zu "Ewigi Liäbi", natürlech d Version vom Jodlerklub Wiesenberg (viiiuuu schönere Dialäkt aus Mash...), heimer di Fahrt guet überstande. Bimne Zwüschehaut ds Pratteln heimernis no mit "Schwizer-Accessiores" bewaffnet u hei bim Zoll no e riiise Wäue füre Hügi gmacht (är het d ID vergässe u het e Tagespass müesse ga la usstelle... piiinlech!).
Dr Umzug isch, ussert de minime Startschwierigkeite (stundelangs Warte) super gsi, es het u viu Zueschouer gha. Si hei zwar viu meh Fasnachtsgruppene gha aus Guggemusige. Viu Wäge hets o gha (mit Technomusig  ).
Im Narredorf heimer üs chönne verpflege u üse Durscht lösche (mit meh oder weniger gsunge Nahrigsmittu), u hei no e Uftritt ufem Platz gha. D Chrottegurgler heimer o atroffe, si si scho letschts Jahr da gsi. I bi natürlech mit mim Schwizer Fähnli ga fäne u mittanze!!!
E Souhufe, 42 Chrüter u Ewigi Liäbi - was wosch no meh?
Reiten Biembach
So, hüt bini wider einisch bir Habanera, dr Suleika u dr Samantha gsi...
I bi mit dr Suleika ga usritte (äuä für sie sit langem wyder zerscht mau eleini), u es isch eigentlech guet gange, bis ufenes paar Bocksprüng.... Wosi aber gmerkt het, dasi nid abegheie, ischs ere äuä verleidet u si isch trotzig witer trabet...
Aschliessend hani no d Habanera ud Samantha füre gno zum putze, ha no es Kafi gno u itz bini deheime, früsch duschet u hie dä Itrag am schribe...
Automatische Brandmäuder
Hüt bini deheime blibe, bi chli mit dr Diva use u ha eigentlech nüt grosses gmacht. Dr Stöffu chunnt ersch uf di Achte hei.
Aber vori hani no grad Action gha! Plötzlech isch e Alarm cho (übrigens hani itz ändlech üses nöie Blauliecht ir Wohnig in Action gseh. Dr Fidu het nis ja so eis montiert, wo bi Alarm-Igang faht afa dräie u lüchte...).
Automatische Brandmäuder ir RBA. Dr Role, dr Bänz u ig si losgfahre, u dr Rüedu isch scho vor Ort gstange u het uf üs gwartet. Kes Wunder, är wohnt ja itz fasch näbedrann. D Clara, wo Wucheändpikett het, isch o cho. D Manne hei du d Alag probiert zrugg ds schaute u mir hei haut chli müesse warte. Aschliessend het nis dr Herr Stucki (techn. Husdienscht) no es Kafi offeriert; isch no gmüetlech gsi...
Schiferie
Am Sunntig morge heimer packt für id Schiferie. Nachdäm ig o ar Diva ihres Züg zämepackt ha (si isch zu mine Eutere id Ferie), simer losgfahre u hei d Diva im Campagna mim Papi übergä.
Womer uf d Riederalp acho si, heimer üses Gepäck ids Hus gsteut, u si no zwe Fahrte ga mache. Aschliessend simer ids Steffis (obligat!!!), e Schihütte-Beiz grad obem nöchschte Lift vo üsem Hus isch.
Nachem Schile simer aube ids Danys, das isch es Pub im „Dorf“ unger (immer no uf dr Riederalp).
Am Mäntig isch herrlechs Wätter gsi u dr Stöffu, ds Mausi, dr Rüedu u ig si houptsächlech zäme gfahre. Am Abe heimer es Fondue gnosse (mmmhhh...)
Am Dsischtig isch nid so hammer Wätter gsi. Mir si du am drü scho ids Danys abe. I wär zwar gärn no chli ga schile, aber di angere hei nüm so möge. Ds Mausi isch am füfi när wider Richtig Gümlige gange, si hei i dere Wuche no züglet.
Am Mitwuch abe isch im Danys Oldies-Night gsi. Mir (das heisst, 10 Persone vor Müller-Kompanie, vier Flückigers u vier Biglers) si ga Znachtässe u hei e mega luschtige Abe gha bimne Bier (oder zwöi, oder drü oder so....)
Donnschtig: Scho wider schlächti Sicht. Dr Stöffu isch am Morge gar nid ersch ufd Schi cho. I bi aber scho am haubi zäni am Lift gsi, bi e Stung ga fahre u ha när es Stündli Coiffeur gnosse...
Aschliessend bini mit Flückigers ungerwägs gsi. Dr Dänu isch o vo Chli uf geng ga schile, u isch auso o e Schlächtwätter-Schifahrer. Siner Ching, ds Nati u dr Sändu, si dementsprächend o nid heiku gsi. D Linda, sini Frou, het ab und zue e chli Pouse gmacht...
Am Fritig isch dr Stöffu scho am Vormittag heigange. Mir hei eigentlech zäme heiwöue, aber ds Wätter isch so mega schön gsi, dases mi chli agschisse het, nid uf d Schi chönne ds ga. Flückigers heimer du abotte, i chönn mit ihne hei, de chönni ono dr ganz Tag schile. Das Agebot hani natürlech dankend agno u mir si bis ufs Eggishorn u ufd Fiescheralp gfahre. Mega schön! Itz hani dä Aletsch-Gletscher ändlech mau live gseh!
Ds Wätter het zwar nid würklech so mitgmacht, aber es isch trotzdäm e mega schöni Wuche gsi!!
Fasnacht Münsingen
Nach däm Isatz bini ids Mäuchi (zu de Grosseutere vom Stöffu) ga ds Mittag ässe, wo mis Mami grad es SMS schribt, dass si u dr Papi uf Münsige dr Umzug gö ga luege (isch ja Fasnacht gsi). Da bini doch o grad mit!
Am Abe bini när mit dr Simone u dr Nicä (vo üser Gugge) ad Fasnacht. E Zyt lang bini im Saal mit dr Linda, dr Nati u em Sändu zämegsi, wüu di zwöi Froue ihrer Manne si ga abhole.
Woni i Saal bi cho, heimer dr Sändu uds Nati gseit, i söu mau mitcho, si wöug mer öppis zeige. Si hei beidi es breits Lächle ufem Gsicht gha, aber würklech viu hanimer i däm Momänt grad nid überleit. I bi es paar Schritte mit u när isch mer du i Sinn cho, dass dr Sändu am Fritig bir Heifahrt öppis vore Konfettikanone verzeut het, wome cha Lüt inetue u när Konfetti obe abe u unger ufe blase wärde.... I ha mi chli gwehrt, aber hane di Fröid glich lasy u bi haut dert ine. Es si no deheime bim abzieh überau Konfetti fürecho!!!
Aues i auem ischs e schöne Abe gsi, i bi zwar gäge di eine rächt müed worde...
D Chlepfschytter hei ds Maid of Orleans (mitem schön Susi-Afang u –Schluss) gspiut (hüenerhut!!!!!!!!!), de isch für mi dr Abe sowieso scho fasch grettet gsi...
Füürwehr: Fiumufnahme + Ärnschtfau
Hüt am morge heimer Fiumufnahme gmacht mit dr Füürwehr. Zwe vor Füürwehr hei im Sinn, e Wärbefium ds dräihe für ar Gwärbusstellig d Füürwehr vordssteue. Es isch aber scho es mega Fiumprojekt mit Sponsore u Dräihbuech usw....
Uf au Fäu heimer äbe hüt morge gfiumet, wi mir im Hof usrücke, we e Alarm inechunnt. Dr Bänz, dr Role, dr Stöffu u ig si hundert mau (nei, nid grad so viu, aber ämu mängisch!) d Stäge abgsecklet. Wider ufe, u wider abe seckle, wider ufe u wider abe....
Aschliessend heimer dunge wöue fiume, wimer d Jagge u dr Helm alege, u id Outo gö. Mir heinis grad wöue parat mache zum fiume, wo grad e Alarm inechunnt. Mir hei d Ohre gspitzt; Allmendingen, Chemi-Brand! Mir schaffe mit de Allmendinger zäme, drum gö mir aube o. Aber mir hei ufds Telefon gwartet vone. Das isch du när o cho, u so simer los, ab id Chäre. Für d Fiumer isches natürlech o grad e Stress gsi, itz heisi nid nume e nachegsteuti Szene gha, sondern hei grad e Ärnschtisatz chönne fiume!
Fasnacht Schliern
Hüt simer bekanntlech ds Schliern ar Fasnacht gsi. Mir heinis am Vormittag z Bäup zum Schminke (u zum ne erschte Dibi Däbi) troffe. Nachdäm das aui gspachtlet si gsi, heimer üs ufe Wäg nach Schliern gmacht. Während em Umzug het sech d Sunne du no chli la blicke... Ds obligate Monschterkonzärt nachem Umzug isch nid schlächt gsi, doch üse Uftritt, womer aschliessend im Rest. Dörfli hei gha, isch nid so überzügend gsi. Irgendwie het nüt wöue klappe.
Aber am Abe (am nüni) heimer e mega super geile Uftritt im Saal abgliferet. Mir hei super Rückmäudige übercho; mir heige sogar d Schlierner Tonschisser übertrumpft...
Am Monschterkonzärt am haubi eis ir Nacht hei när nüm viu mitgmacht. Grad d Schlierner u öppe zä Persone vo üs si uf dr Büni gsi...
D' Belper Fasnacht isch verbi!!
So, d Bäuper Fasnacht isch verbi!
Mir heis mega luschtig gha, d Gaschtguggene hei e geili Stimmig gmacht, u i darf o säge, dass o mir mega guet gspiut hei u ds Fasnachts-Areal zum zittere bracht hei.
A propos Areal - di nöi Location (Aare-Saal, Dorfplatz mit Guggezelt, Raclettestube, Bar, Kinderattraktione...) isch e super Sach gsi, dr Ufwand het sech auso glohnt!
Mir hei zwar rächt krampfet, aber he! MEGA GEIL GSI!
Biuder demnächscht uf www.guggebelp.ch
Mi erscht Ärnschtfauisatz!!!
Geschter Abe bini öppe am haubi eufi ga lige, dr Stöffu isch no uf blibe. Plötzlech stürmt er ids Schlafzimmer u rüeft: "Ufstah, muesch cho!! Chum itz!!". I bi so baff gsi (bi ja scho am schlafe gsi): "Was isch los? Isch Alarm?" (i hane nid emau ghört....). - "Wohnigsbrand!". Uuuu, de bini du schnäu uf gsi!
I bi bim Bänz ids Pi (Unimog) igschtige u de simer losgfahre; vorab ds TLF, när dr Hubretter, u no mir. I ha gschlotteret einersits vor Ufregig aber vorauem o wüui u chaut ha gha. Es het mer nume glängt, ds T-Shirt unger dr Brandschutzjacke adslege...
Mir si am Schadeplatz itroffe, u d "Rennleitig" (Pozilei) het o nid lang uf sech la warte. D Atemschützler si ids Grät u si mitem Schnäuagriff (Schluch ab TLF) ids Hus. I ha bim Rüedu usse gwartet uf witeri "Befähle", oder das me öppis hätt chönne häufe. Dr Rüedu het mit de Atemschützler gfunket, u de isch schnäu uscho, das ir beträffende Wohnig kener Persone meh si. Ufff... mau e Erliechterig! Gli druf abe isch ono dr Schnäuisatz cho (ca. 16 Lüt)... Mir hei no e Lüfter ids Stägehuus gsteut, dasses dr Rouch chli verlüftet.
Plötzlech chunnt aber dr Rolä mitemne Ching ufem Arm zum Hus us; da erchlüpft me schono chli! Es isch d Familie gsi, wo ob dr "brönnende" Wohnig wohnt; si hei Rouch verwütscht u mir hei se zur SaPo (wo o scho uf Platz isch gsi) begleitet.
Wo aues glöscht isch gsi, isch eine no ga d Wärmebiudkamera hole, für sicher ds si, dases niene meh e Wärmequelle het, wo wider chönnt afa brönne. Dr Rolä het mi grad päcklet u gseit, i söu doch grad mitcho luege, de heigi sone Brand o scho mau gseh. Isch auso no idrücklech, was so wenig Füür cha bewürke...
Brönnt het eigentlech es Bett, resp. e Matratze. Ds Zimmer isch "vercholet", aber ussert em Bett si kener angere Möbu drinne gsi. Brandursache het uf Platz nid würklech chönne klärt wärde, si nähme a, es sig wägemne Heizchüssi, wo ufem Bett isch gsi.
Öppe am haubi drü (churz vo de eine isch übrigens dr Alarm inecho) simer du vor Rennleitig "entlah" worde u mir si hei zue gfahre. Es scho so liecht gschneierlet, und siehe da, hüt morge hets auso scho rächt Schnee gha...
Mir hei im Magazin no e chli glaferet (es paari hei no es Bierli trunke...) u am drü simer o wider im Bett gsi. Di obligati Duschi nach somne Isatz (Rouch blibt sofort überhau hange, wäää, stinkegi Haar, stinkigs T-Shirt...) hani aber ersch am morge gno...
Hundeschueu
Am Samschtig bini auso zersch mau ir Hundeschueu gsi mit dr Diva. Es isch no luschtig gsi...:
I bi di einzegi gsi, wo zerscht Mau dr bi isch gsi, di angere hei aui scho letschts Jahr mitgmacht. Zersch heimer se uf dr Wise chli la umeseckle u de het d Diva o scho es „Gspähnli“ gfunge; äuä o e Mali-Mix oder sogar e reinrassige Malinois, i weises nid...
Aschliessend heimer se aui agleinet u si i zwe Gruppe iteilt worde (Prüefigsgruppe u Familiehundgruppe). I bi natürlech ir Familiehundgruppe, da i ja no nid so rächt weiss, i weli Richtig dasi de mit ihre wett schaffe... Ihres Gspähnli isch aber ir angere Gruppe gsi.
Vo da ah, het d Diva konsequänt jede Hund ignoriert, wemer uf eire Linie oder im Kreis si gstange, het si geng i di angeri Richtig ufs offene Fäud gstarrt, u het gschlotteret. Sicher einersits o wüu si chaut het gha, aber houptsächlech äuä, wüus eifach grad e chli too much isch gsi fürse. Soviu nöi Hüng, soviu nöi Lüt. D Nicole u d Irene (d Leiterinne) hei das o gseit u hei gseit, mir löh se chlei la si u tüe se nid grad überfordere. Drum hani o nume d Leinefüehrigkeits-Üebige u d Ungerordnigsüebige gmacht. Dr Parcours wo no ufgsteut isch gsi, hani nid gmacht. I gloub si hätt mer nid so gfouget...
Aber schüsch, aus i auem isches rächt guet gsi, u i wirde witerhin mit ihre di Hundeschueu bsueche...
Ritte im Bedli
Hüt bini wider eis im Bedli gsi ga ritte. Isch no gmüetlech gsi, mir si wider einisch e autbekannte Trupp gsi; d Anita, dr Hämpu, ds Käthi u ig. D Leika (dr Hund) het nis o begleitet.
Am Abe nachem ritte bini hei zu de Eutere, u ds Mami u ig hei a mim Fasnachts-Kostüm „umebaschtlet“. Das isch auso schono es gmurgs! Aber i gloube, es chunnt guet. Am 27. Januar mueses de fertig si. Für mis hani nid Angscht, da simer itz wit cho, aber ds Mami het ihres no gar nid agfange! Naja, mir si no immer so knapp dranne gsi...
"Rittbeteiligung" zum 2.
So, hüt bini auso i däm Biembach gsi, u ha di zwöi Haflinger gritte, d Suleika u d Habanera. Di 19-jährigi Fribi-Stuete, d Samantha, hani no nid gritte.
Mit dr Suleika bini öppe e haub Stund ids Gländ, di isch ohni Problem gange. D Habanera isch e chli närvöser gsi, die hani när ufem „Pseudo-Plätzli“ (isch äbe chli unäbes, auso nid flach...) gritte. O si geit eigentlech guet, reagiert guet ufe Druck mit de Bei, meh muess se auso nid ade Zügu umeschriisse... Ds Problem isch eifach chli dr Änglisch Sattu. Är passt nid so richtig, u drum rütscht er chli hin u här.
Itz gani de chli regumässig die ga ritte, chlei d Kondition ufboue, chlei Bodearbeit u när dänki, geit das de guet mit ne. Vilech choufi de afang mau es Western-Zäumli, u wär weiss, vilech tüemer de mau e Westernsattu zuche, wär natürlech dr Hammer!
|
Kostenloses Blog bei Beeplog.de
Die auf Weblogs sichtbaren Daten und Inhalte stammen von
Privatpersonen. Beepworld ist hierfür nicht verantwortlich.
|
