Hüt bini mitem Papi zu sim Arbeitskolleg. Dä isch Diräkter vor Treuhandstelle Milch, aber das würd me ihm nid agseh, wemes nid wüsst. Me gseht ihm scho a, daser e "Buur" isch. Wobi är eigentlech nume näbeby buuret...

Dä het äbe drü Ross (zwe Haflinger, ei Fribärger), aber di letschte paar Jahr heter eifach ke Zyt gha, die regumässig ds ritte, u sini Frou würd gärn, het aber eifach zfescht Angscht, eleini ga ds ritte. Dr Papi het ihm vo mir verzeut, dasi es Prakti ha gmacht u itz immerno teilzyt aus Pferdepflegere schaffe, u dä Schüpbach Hans het gseit, är wäri nume froh, weni zwüschdri gärn wett cho ritte.

Itz simer auso hüt i dä Biembach, das isch es Kaff im Ämmitau, grad vor Hasle-Rüegsau. Är het auso mega fröid gha, dasi zuegseit ha, u är het mi gfragt, obi de sire Frou chli chönnt zeige wie me mit de Ross umgeit u ihres Vertroue chlei fingt. Si würde mi de auso o drfür zahle! Das wotti eigentlech de nid unbedingt, vilech chanire de ihri Angscht glich nid näh, aber i probieres ämu.

Nächscht Samschtig gani di Ross mau ga ritte, u de chani de jederzyt ga, weni wott, ohni mi adsmäude. Das isch eigentlech no gäbig, de chani mache wi ig wott, cha mau amne Abe ga, oder so. Är het u Fröid gha u het gmeint, är wöug de o wider mau cho usritte, itz heiger de chli meh Zyt...

Itz luegemer mau, obi mit dene Ross chli öppis cha schaffe, si si haut ir letschti nüm so viu gritte worde, aber das wird öppe scho ga... (Obi mi äch de a di Änglischi Usrüschtig cha gwane???)

[Permalink]

Hüt hani nach de Wiehnachtsferie wider dr "erscht" Arbeitstag gha. Respäktiv, i bi ds Salvenach ufem Friesenhof ga schaffe. 4 Stund Akkord-Mischte!!! Das brucht eim schono chli! Aber i ha nume bis am Mittag gschaffet, isch mer grad rächt gsi eso...

Am Namitag si dr Stöffu u ig de chli ga loufe. Mir hei eigentlech id Fähribeiz ad Aare abe wöue, aber di het du zue gha. Auso simer öppe 1,5 Stund ungerwägs gsi, si dür haub Muri gloffe. Isch no gmüetlech gsi!

[Permalink]

So, o ig bi guet ids nöie Jahr grütscht. U i has grad mitemne DVD-Marathon gstartet... Ha öppe sächs Fouge McLeods Töchter gluegt. Für die wos nid kenne: www.mcleods-toechter.de.

I hamer di erschti Staffle uf DVD bsteut... E mega gueti Serie!!!

[Permalink]

Hüt bini am Namitag ga miner Tattoos nachestäche bir Tina... aua.... Aber äbe, "Schönheit" mues lide...

Si het mer äbe gseit, dass si när zu Flückigers ads Adväntsfänschter gö... Dr Dänu Flückiger isch Vizekommandant vor Füürwehr, drum kenne mer die. I ha dänkt, das wär doch öppis, bi hei ga dr Stöffu hole (ud Diva ga ablade), u när simer ono gange. Das isch öppe am haubi sächsi gsi. U itz simer grad heicho. Es isch auso schono luschtig gsi; es het Glüehwy gä u im Pizzaofe heisi Pizzas u Flammchüeche gmacht. Mmmhhh, fein gsi! Es si natürlech viu "kennegi" Lüt vor Füürwehr drbi gsi, u de isches natürlech immer luschtig... Naja...

So, morn heimer ds erschte Wiehnachtsässe ds Rüschegg mit dr Familie... Fondue Chinoise, mmh!!!

[Permalink]

So, i bi auso am Fritig morge uf Salvenach i dä Stau gange... Si si grad am fuettere u mischte gsi, u da i ja nüt los ha gha dr ganz Vormittag, hani dänkt, i häufi grad mit. Aschliessend heimer no d Ross usegla...
Si hei öppe 7 Shetland-Ponys (di ganz chline), Friese, Lippizaner u Vollblüter, aber wivius im Totau si hani nid so rächt chönne zeue... Dr Stau isch e chli "verzettlet", hie es paar Boxe, da es paar Boxe, aui rund ums Hus ume. Das chöm no vo dere Zyt, wo zwe Parteie i däm Hus hei gwohnt u jedi het chli säuber öppis brösmelet...

Ab itze gani regumässig Mittwoch morge u Fritig dr ganz Tag dert ga schaffe. So chani chli öppis näbebi verdiene. Zwüschdri gani vilech de o mau amne Weekend, oder so...
Am Fritig (oder eifach weni dr ganz Tag schaffe) hiufi de o d Ross bewege. Mau luege, wi de das geit! I cha "nume" Westernritte u ha ke Ahnig vo däm "Barock"-Rite... Aber das wird öppe de scho ga, dr Jürg het gseit, i überchömi de schnäu Fröid am Friese ritte. Da hani eigentlech o ke Angscht; d Friese si aus chlises Ching immer miner Troumrösser gsi (ganz schwarz, schöni läääängi Mähne...). Aber äbe, ob mer de das passt mitemne Änglischsattu... naja, luege mer mau. Uf au Fäu wirdi de o mitem Fahre i Kontakt cho. Dr Jürg het gseit, wener göng ga usfahre brucher o immer öpper, wo mitchäm...

D Diva chani ohni Problem mitnäh. I wirde se aber zwüschezytlech de o chli müesse abinge, weni se nid immer im Blickfäud cha ha, zum Bispiu während em ritte. Vilech chani se de uf d Usritte mitnäh, wär natürlech dr Hammer...

Äbe, mau luege. Am Mittwuch gani itz zersch mau ga schaffe...

[Permalink]

Da i nume 70 % agsteut bi (git nid soviu Lohn), bini uf dr Suechi nachemne Näbejöbbli, womer gfaut, aber woni glich e chli öppis verdiene. Bir Sylvia gfauts mer mega, aber dert gani gratis, resp. gäge Ritstunde ga schaffe... Di hei zwar e Wärt vo 80 Franke, aber mir wär Bargäud scho o chli lieber...

Itz hami drzue ufgrafft Inserätli uf jedi Ross-Site woni gfunge ha, uf ds schaute. U prompt het sech doch öpper gmäudet! Geschter hani ds Inserat gschribe, hüt scho e Antwort, wow.

Es isch e Pensionsstall u Rittschueu, auso fasch so, wis ds Sylvia het. Aber si tüe äbä nid Westernritte   sondern Barockritte (so à la Ludwig XI, oder so...), aber es isch eigentlech meh verwandt mitem Westernritte aus mitem Änglischritte... Eh ja, i weises o no nid so genau.
D Ross wosi hei si houptsächlech Friese (das si aus Chind mini Lieblingsross gsi, wüusi ganz schwarz si u so e megaschöni, längi Mähne hei...)

Auso i ga itz am Fritig morge eifach mau ga luege... Si würd mi wine usglehrti Pferdepflegerin zahle, d. h. Fr. 80.- plus Mittagässe (ohni Mittag Fr. 100.-, aber isch äuä gäbiger, weni de grad dert chönnt ds Mittag ässe).
Dä Stall isch in Salvenach, isch ganz ir Nöchi vo Murte... Si hei o vier Hünd (e Schäfer-Husky-Mix,  e dütschi Dogge, e Pit Bull Terrier und e Staffordshire Bullterrier...), auso sicher ganz härzegi (di zwöi letschte fasch wi d Diva)...

Das wär d Homepage vo däm Stall, wes öpper würd interessiere...

www.friesenclub.ch

[Permalink]

Es isch scho wider Gschicht, üses Jahreskonzärt.

Es isch u guet gsi, mir si eigentlech im Grosse u Ganze zfride. Dr Hans Luterbacher isch mit grossem Trari-Trara (vorauem mit viiiiuuu z länger Red vor Präsidentin) verabschiedet worde.

Siner Giele u Modis (d Tamboure) hei organisiert, dass "em Hans siner Tamboure" chöme cho spile, das heisst: Dr Tamboureverein Biberist (dert ischer ufgwachse u het ds Tambourespile glehrt), dr Tamboureverein Bern (heter lang gleitet), d Tamboure vor KaPo Bern (tueter leite) u natürlech d Knäbschler Tamboure...
Es het auso scho chli möge dröhne, wosi aui zäme dr "Meilestei" gspiut hei, es Stück, wo dr Hans zum 100 jährige Bestehe vor Knabemusig komponiert het...

[Permalink]

So, uf dr Homepage vor Gugge Belp si d Föteli ufgschaute worde. Isch e Klick wärt...

http://www.guggebelp.ch/foto/2006/06_dezembermaerit/index.htm

[Permalink]

Am Samschtig isches mau wider sowit: Ds Jahreskonzärt vor Knabenmusik Bern findet im Casino statt. Grossi Ufregig... Aber das chunnt guet!

Dr langjährig Tamboureleiter Hans Luterbacher wird verabschiedet, a sini Steu tritt dr Reto Lüthi (TV Bern).

Witeri Infos uf www.knabenmusik-bern.ch

[Permalink]

Geschter isch dr Dezembermärit gsi ds Bäup, womer mit dr Gugge geng e Stand hei... Ojemine... Ha chlei viu Aukohou gha... Aber es isch ämu mega luschtig gsi!

Mir hei dises Jahr üse Stand ine Schihütte verwandelt - Schihütten-Party à la Skiweekend...! D Uftritte si guet glüffe, mir hei nid mängisch drnäbe gspiut. Aues i auem isches e glungne Sunntig gsi!

[Permalink]

Am Fritig Morge, 24.11.06, zä ab zwöi, het dr Alarm gschäuet. Da ig ja o ir Füürwehr bi, darfi o mit usrücke... Das heisst, sofort ufstah, ab i Gang, Stifle u Hose alege u abe d Jagge u Heum ga fasse u ines Fahrzüg. I bi mitem Unimog mitgfahre, dr Tisu isch gfahre u dr Neuhaus Tinu isch o i üsem Fahrzüg gsi. Isch no so e spezielli Fahrt gsi, für mi isches dr erscht Isatz gsi, u füre Neuhaus Tinu dr letscht. Di si nämlech geschter nach Belp züglet...

Auso, mir si de im Multeguet acho (Seniorenresidenz), u es isch e outomatische Brandmäuder gsi, wo dr Alarm usglöst het. Si hei Omelette gmacht u dr Dampfabzug nid igschaute (Heisshunger?? Am morge am zwöi Omelette brätle??) Eh ja, zwe si ine ga luege u mir hei ir zwüschezyt dr Brand ds Wabere beobachtet. Übere Funk heimer mitübercho, dass bir Mittustation vor Gurtebahn es Burehuus brönnt. Si si chlei i Stress cho, durent heisi mitenang gfunket u nach Wasser u Schuum verlangt... Mir hei vo üs us eifach dr rot Himmu gseh. Het schön usgseh, aber Isch schono so gfürchig gsi, weme weiss, dass e ganzi Burefamilie ihres Hus, ihri Erinnerige etc. verlüre...

Irgendeinisch si de di zwe wider usecho u mir hei wider heichönne. Gmacht hets nüt, mir hei eifach dr Lift wider müesse i Betrieb nä u sicher ga, dass es würklech niene brönnt... Isch auso no so e turbulänti Nacht gsi für mi...

[Permalink]

Am Samschtig isch dr 11.11. gsi, das heisst: Fasnachtsafang!!! Ds Wätter het super mitgmacht u o am Wysse hets nid gfäuht (dr Aasatz isch dementsprächend guet gsi...). Punkt 11 ab Eufi (meh strittet sech zwar noch chli drüber, ob mer würklech pünktlech hei agfange) heimer d Fasnacht ufem Dorfplatz ds Bäup iglütte. Ds Thema vor Belper Fasnacht 2007 isch bekannt worde: Bäup hebt ab!

U o miner Tattoos si, wi dir uf dr erschte Site heit gseh, si mines Erachtens super usecho! Mittlerwile het sech es Rüüfli drüber biudet, aber o das isch langsam am verheile...

I bi immer no am Hundeschueu sueche, damit i mire Diva ihri Mackene chli cha ustrainiere... I hoffe, i finge de nächstens mau öppis...

Letscht Fritig hei mis Mami u ig agfange, am Stöffu sis Gwändli ds näihe. Mir isch bis zu däm Zytpunkt no gar kei Idee cho, wi ig mis de chönnt gstaute. Aber schlussändlech isch mer a däm Abe glich no öppis i Sinn cho u i ha das ufzeichnet. Itz geits nume no ads näihe...!

[Permalink]

[Permalink]

Geschter isch ds Deitingen no d Schwizermeischterschaft im Westernritte gsi. I bi geschter morge nach ca. 4 1/2 Stund erwachet (immer no mit Aukohou im Bluet...) u ha nüm chönne witerschlafe (trotz zuviel Alohol...). Auso bini ufgstange, mit dr Diva use, u ghoffet, dases mer öppe de nüm so sturm sig... Ha no öppis gässe u de isches de so langsam gange. I bi auso uf Deitingen gfahre, woni scho es paar Bekannti troffe ha. Mir hei d Finals vo de Diszipline Open Superhorse all Ages, Youth Reining und Open Snafflebit Reining gseh. Isch mega guet gsi! Unger angerem het o d Julie Hossmann teilgno, si isch a üsem Brevet d B-Richterin gsi, u het mi mündlech prüeft... 

[Permalink]

Am Samschitg isch d Houptüebig vor Füürwehr gsi. Isch no luschtig gsi, ha zum Glück nid so viu müesse mache. Da das ja mini erschti Üebig isch gsi, bini froh gsi, dasi chlei ha chönne zueluege u luege, wi das hie so louft... I bi mit drüne angerne (zwe Trupps à je 2 Lüt) ufem TLF iteilt gsi u mis Jöbbli isch gsi, mit mim "Kamerad" d Zuebringerleitig zum TLF ds zieh, resp. i ha dr Hydrant bedient. Das heisst, Hydrant spüele, Leitig aschliesse, ufträie. När hani nüm ds tüe gha, bises de wider drum gange isch, abdsrume...

Am Abe isch när dr Füürwehrball gsi. Jesses Gott....! Ab de sächse Apéro (Wisswy), när Znacht ässe (Rotwy) u när ab ad Bar (ca. 6 "Flashover" = Passoa Orange, es Baileys u öppe no füf Grappa....) Naja, ds Resultat cha sech jede säuber usmale... Mir hei ds Viert e "Froue-Tisch" gha u heis mit de Passoa Orange luschtig gha. Wo du di drü Froue langsam hei si, bini uf Grappa umgstige (mmmmhhh!). Uf ds mau isch mi dr Flückiger Dänu (Vizekommandant) cho schnappe u het mit mr wöue tanze. I ha zersch nid wöue, wüu i das nid cha. I bi immer so fasziniert vo dene, wo tanze (dr ganz eifach Foxtrott, eifach dä, wome geng tanzt a jedem Chäferfescht), aber chönne hanis säuber leider nie. Är het mr aber das grad bibracht, was no erstundlech guet isch gange (guet, das isch näbscht em Dänu vilech o chli am Grappa ds verdanke...) Uf au Fäu heimer no rächt lang tänzlet u öppe am füfi het dr Stöffu (!!!) heiwöue (Wäut ghei um, das isch no nie vorcho, dass är ender hei wott aus ig!). Dr Röfä het nis du hei begleitet u dank däm simer ämu heil acho... Isch auso no e luschtige Abe gsi...

[Permalink]